Sansar News
काठमाडौं । बीमितको अधिकार र हित सुनिश्चित गर्न माग गर्दै पेशागत बीमा अभिकर्ता संघ नेपाल र हिमालयन लाइफ इन्स्योरेन्स लिमिटेडको संयुक्त आयोजनामा काठमाडौंमा विरोध कार्यक्रम सम्पन्न भएको छ ।
कार्यक्रममा बीमितले पाउने न्यूनतम बोनस दर प्रति हजार ५० रुपैयाँ हुनुपर्ने मागसहित सात बुँदे मागपत्र सार्वजनिक गरिएको हो ।
कार्यक्रममा वक्ताहरूले बीमा व्यवसायमा पारदर्शिता र समानताको अभावले बीमितको विश्वास घट्दै गएको उल्लेख गर्दै तत्काल सुधारका कदम चाल्न आग्रह गरे ।
उनीहरूले प्रतिस्पर्धी कम्पनीहरूमा जस्तै बोनस दर कायम गर्न, व्यवस्थापनको लापरवाही नियन्त्रण गर्न र बीमक समिति तथा नियामक निकायले निगरानी भूमिका सशक्त बनाउनुपर्ने माग गरे ।
संघले जारी गरेको सात बुँदे मागमा बीमितको सर्वोपरी हित कायम गर्न, बोनस दर बराबरी गर्न, व्यवस्थापनको लापरवाही नियन्त्रण गर्न, वेथिती र भेदभावपूर्ण नीतिको अन्त्य गर्न, असक्षम सि.इ.ओ.को राजीनामा गराउन र बीमितमाथिको विश्वासघात रोक्नुपर्ने उल्लेख छ ।
विरोध कार्यक्रममा सहभागीहरूले “बीमितको विश्वासमाथिको खेलबाड बन्द गर”, “अक्षम सि.इ.ओ. राजिनामा गर” जस्ता नाराबाजी गर्दै बीमा क्षेत्रमा देखिएको अन्याय र भेदभावको विरोध जनाएका थिए ।
वि.सं.२०८२ असोज २७ सोमवार १६:३६ मा प्रकाशित
