Sansar News
कञ्चनपुर । लालझाडी गाउँपालिकामा विश्व बैङ्कको करिब ३० करोड रुपैयाँको अनुदानमा सडक स्तरोन्नति कार्य सुरु गरिएको छ ।
प्रादेशिक तथा स्थानीय सडक पूर्वाधार कार्यक्रमअन्तर्गत गाउँपालिका–६ चानदेवदेखि वडा नं २ काठमाडौँ डाँडासम्मको १३ दशमलव ६ किलोमिटर सडक कालोपत्र हुने भएको हो । गाउँपालिका अध्यक्ष निर्मल रानाका अनुसार यसका लागि ठेक्का सम्झौता गत वैशाखमै भएको हो ।
उनी भन्छन्, “सडक कालोपत्र कार्यका लागि डुकुचु–अनक–जोशी जेभीसँग ठेक्का सम्झौता भइसकेको छ, अब केही दिनभित्रै निर्माण सुरु हुन्छ ।”
सडकको पाँच मिटर चौडाइमा कालोपत्र हुनेछ भने नालासहित आठदेखि १० मिटरसम्मको चौडाइ रहनेछ । निर्माण कार्य आगामी जेठ महिनाभित्र सम्पन्न गर्ने योजना रहेको अध्यक्ष रानाले बताए ।
सडक कालोपत्र भएपछि पूर्वतर्फ सुदूरपश्चिम प्रदेशको सदरमुकाम धनगढी र पश्चिमतर्फ जिल्ला सदरमुकामसम्मको आवागमन सहज हुने गाउँपालिकाको विश्वास छ ।
प्रादेशिक तथा स्थानीय सडक पूर्वाधार कार्यक्रमका व्यवस्थापक रामचन्द्र खत्रीका अनुसार जग्गा समस्या भएका क्षेत्रमा प्रभावित परिवारसँग छलफल भई समाधानको प्रयास भइरहेको छ ।
वि.सं.२०८२ असोज ३० बिहीवार ०७:०९ मा प्रकाशित
