हामी सबैकाे संसारन्यूज

सुशील रिजाल
कीर्तिपुर, काठमाडौँ

नसोध जिन्दगी तिमी कहाँ छ खासमा खुसी
कतै छ निम्सरो लुसी कतै छ रासमा झुसी।
रमाउने विचार जो दगुर्छ मार्छ बुर्कसी
इनाम नाम दामको छ नित्य दौडमा कुदी ।१।

गजक्क पर्छ दामले म मात्र ठान्छ अब्बल
इलाज छैन लाजको रजाइँ गर्छ दुर्बल
सदैव आस गाँसको सुदूर दूरमा सुन
लडाउँदै छ जिन्दगी भजाउँदै निवेदन ।२।

कि बैँसमा खुसी थियो प्रिया थिइन् समीपक
बिछोडको वियोगमा सताउँछिन् अझै तक
उदास दासको कथा सुनाउँछन् सबै यहाँ
नसोध है कठै तिमी मनाउने खुसी कहाँ ।३।

चिलाउने कन्याउने उमङ्ग भर्छ आसमा
बबाल ठान्छ जिन्दगी सडाउँदै हतासमा ।
समस्त मस्त छन् कहाँ छ यक्ष प्रश्न चिन्तन
उचाइमा चढाउँदै थचार्छ भाग्यले किन ?४।

उदाउँदो प्रभातझैँ मुसुक्क हाँस्दछौ तिमी
सुरम्य रम्य साँ!झमा प्रहार गर्छ बैगुनी ।
विभेद गर्छ भाग्यले सजाय दिन्छ पौरख
न मेट्छ प्यास दौडमा न भेट्छ आत्म गौरव ।५।

छन्द : पञ्चचामर
गण : ज – र – ज – र – ज – गु
सङ्केत :ISI – SIS – ISI – SIS -ISI -S