हामी सबैकाे संसारन्यूज

रामशरण न्यौपाने, भक्तपुर

वीरताको कथा लेख्ने, छैन यौटा महारथी
स्वर्थको राग ढालेर, देश हुन्छ दिगो कति ?।
नहाँस अब ठट्टामा, देखाएर तिमी गिजा
म आगो अब ओकल्छु, छेउलाग झिँजामिजा ।।१

हल्लाले देश चल्दैन, भोकाको भिडमा बसी
मितेरी स्यालको गर्दा, जोगिन्न खोरको खसी ।
दिदीको खत माफीमा फुर्किदैछन् उता जिजा
म आगो अब ओकल्छु, छेउलाग झिँजामिजा ।।२

नपाई श्रमको मूल्य, योग्यताको समर्थन
साहुको ऋण बोकेर, दाउ राखेर जीवन ।
युवा विदेशमा लागे, देशमा छन् बुढा मिजा
म आगो अब ओकल्छु, छेउलाग झिँजामिजा ।।३

चोरलाई छ चौतारो, सोझालाई छ शूल नै
हत्यारा र बलात्कारी पुजिन्छन् फूल तुलमै।
जाल काट्छन् ठुला माछा,पर्छन् गङ्गुलमा खिजा
म आगो अब ओकल्छु, छेउलाग झिँजामिजा ।।४

राष्ट्रको धन धेरैले, पार्नथाले यहाँ निजी
जनता देशका धेरै, मर्दैछन् आँसुमा भिजी।
कसैलाई ढिँडो छैन, कसैलाई सधैँ पिजा
म आगो अब ओकल्छु, छेउलाग झिँजामिजा।।५

छन्द : अनुष्टुप्
a