हामी सबैकाे संसारन्यूज

उत्तमकुमार पोखरेल
सूर्यविनायक–३ , भक्तपुर

प्रयोगी सबैको रतन्धो छ आँखा
कतै शेष छैन उजाडेर पाखा ।
सबै आँत खाई मिले आज भाइ
भनौँ के म भेडा बसे खान लाई ।१।

सधैँ सेज मेरो बढेको छ भन्दै
भने मुस्कुराई सधैँ मान भन्दै ।
भए दास जस्तै झुकी पाउ सामु
लगाएर रेती लिएको छ रामु ।२।

सधैँ गान तिम्रै गरेँ मान तिम्रै
बुझे आज आई हरे मान हाम्रै ।
कठै ! मान तिम्रा गए आज उड्दै
न फर्किन्छ आफै गयो सान डढ्दै ।३।

भनेका सबैले भए आज भेडा
थिए साथ बस्ने भए आज टेढा ।
लुटे भेष हाम्रो भएँ आज नाङ्गै
खुली वस्त्र सारा भएझैँ उदाङ्गै ।४।

बसे साथ मेरो सबै बात मान्नु
छ यो दुष्ट घाती शिकारी हुँ जान्नु ।
गरे बात यस्तै सुने जो सबै यो
भुलेँ आज नाता पराई भयो जो ।५।

छन्द : भुजङ्गप्रयात
गण : य – य – य – य
सङ्केत : : ISS – ISS – ISS – ISS