हामी सबैकाे संसारन्यूज

सुन्दरप्रसाद रिजाल, विराटनगर

नानीभित्र बास बसेर परेलीका ओठ चलाउँछौ तिमी।
सांकेतिक भाषाको इसारा नबुझ्दा सधै गलाउँछौ तिमी।।

मोह माया जन्मेसि उब्जिने एक प्रकारको कम्पन होला।
प्रेमको दियोमा बाती हालेर नेत्र दीप जलाउँछौ तिमी।।

धेरै कुरा सुनेर मनलाई भ्रमित बनाउनु हुँदैन।
अरूको नजरमा बनेको अस्तित्व किन ढलाउँछौ तिमी।।

नयनमा बग्ने धारहरू सधैँ एकनास कहाँ बग्छ र?
तर पनि मौका मिले प्रेमिल नयनले दलाउँछौ तिमी।।

यसै कारण थाहा हुँदैन प्रेमको द्वार सधैँ खुला राख्दा ।
नयनका नानीमा मलाई बास दिने कहलाउँछौ तिमी।।

अक्षर सङ्ख्या : २१
अनुप्रास : अलाउँछौ
अत्यानुप्रास : तिमी
अभ्यास :चारु अभ्यास पाठशाला