हामी सबैकाे संसारन्यूज

काठमाडौँ । नेपालको अग्रणी तथा प्रतिष्ठित व्यावसायिक घराना पद्म ज्योति ग्रुप ले रिच्स इन्डिया सँगको आफ्नो सहकार्यलाई थप सुदृढ बनाउँदै विस्तार गरेको छ। यससँगै नेपालको खाद्य सेवा तथा पाककला क्षेत्रको विकास र विस्तारमा योगदान पुर्‍याउने प्रतिबद्धता दुवै कम्पनीले व्यक्त गरेका छन्।

‘रिच्स’ले विगत दुई दशकदेखि नेपालमा आफ्नो उपस्थिति जनाउँदै आएको भए पनि यो नयाँ सम्झौताले ग्राहकसँगको सम्बन्धलाई अझ सुदृढ बनाउने, सेफहरूको क्षमता अभिवृद्धि गर्ने तथा नेपाली बजार सुहाउँदो विश्वव्यापी पाककलाका नयाँ प्रवृत्तिहरू भित्र्याउने रणनीतिक भूमिका खेल्नेछ।

सन् १९४५ मा स्थापना भएको Rich Products Corporation ८० वर्षभन्दा लामो अन्तर्राष्ट्रिय विरासत बोकेको पारिवारिक खाद्य कम्पनी हो। दूधजन्य पदार्थबिनाको फेटेको सजावट मिश्रण उत्पादनमा अग्रणी मानिने यस कम्पनीले आधुनिक बेकरी, मिष्ठान्न तथा खाद्य सेवा क्षेत्रलाई नयाँ स्वरूप दिन महत्वपूर्ण भूमिका खेलेको छ। कम्पनीले उपभोक्ताको बदलिँदो चाहना र आवश्यकतालाई ध्यानमा राख्दै नवप्रवर्तन, गुणस्तर र साझेदारीमा निरन्तर लगानी गर्दै आएको छ।

पद्म ज्योति ग्रुपसँगको यो विस्तारित सहकार्य परम्परागत वितरण प्रणालीमा मात्र सीमित रहने छैन। यसले ग्राहक अनुभवलाई उत्कृष्ट बनाउन सेफहरूसँग प्रत्यक्ष समन्वय, प्रयोगात्मक प्राविधिक तालिम तथा ज्ञान आदानप्रदानमा विशेष जोड दिनेछ। यसको उद्देश्य ‘रिच्स’का विश्वस्तरीय प्राविधिक दक्षता र उत्पादनको सही प्रयोगबारे नेपालभरका भान्सा विज्ञ, बेकरी व्यवसायी तथा खाद्य सेवा सञ्चालकलाई जानकारी गराउनु हो।

यस अभियानलाई सफल बनाउन पद्म ज्योति ग्रुपले आफ्नो सुदृढ पूर्वाधार, स्थापित वितरण सञ्जाल तथा नेपाली बजारको गहिरो बुझाइलाई पूर्ण रूपमा उपयोग गर्नेछ। सहकार्यअन्तर्गत आधुनिक खुद्रा व्यापार, बेकरी तथा आतिथ्य क्षेत्रलाई उच्च गुणस्तरका उत्पादनसँगै प्राविधिक मार्गदर्शन, प्रत्यक्ष प्रदर्शन तथा निरन्तर सहयोग प्रदान गरिनेछ।

पद्म ज्योति ग्रुपले सन् २००७ मा Sun International Incorporated Pvt. Ltd. मार्फत तीव्र उपभोग्य वस्तु क्षेत्रमा प्रवेश गरेको थियो। त्यसयता कम्पनीले आइसक्रिम तथा जमाइएका मिष्ठान्न क्षेत्रमा आफ्नो उपस्थिति सुदृढ बनाउँदै देशभर वितरण सञ्जाल विस्तार गर्दै आएको छ।

ग्रुपका अध्यक्ष सौरभ ज्योति को नेतृत्वमा संस्थाले नेपाली बजारको बदलिँदो जीवनशैली, स्वाद र आकांक्षालाई सम्बोधन गर्दै गुणस्तरीय तथा समसामयिक खाद्य उत्पादनहरू भित्र्याउने कार्यलाई निरन्तरता दिँदै आएको छ।

यस सहकार्यबारे बोल्दै रिच्स इन्डिया, मध्यपूर्व र टर्कीका प्रबन्ध निर्देशक पंकज चतुर्वेदी ले नवप्रवर्तन, विशेषज्ञता र बलियो स्थानीय साझेदारीमार्फत नेपालको पाककला क्षेत्रलाई नयाँ उचाइमा पुर्‍याउने विश्वास व्यक्त गर्नुभयो।

यो सहकार्यले नेपालको पाककला तथा आतिथ्य क्षेत्रलाई नयाँ दिशा र अवसर प्रदान गर्ने अपेक्षा गरिएको छ।