Sansar News
ऋषिराम भुसाल,गुल्मी मदाने, हाल- काठमाडौं
यो देश ह्वारह्वार जलेको पनि देखियो
इतिहासका पाना बलेको पनि देखियो
सुनौला सपना बोकेका ती कलिला बच्चा
गोली लागी भुइँमा ढलेको पनि देखियो
हिजोसम्म सम्मान पाएका केही मान्छेको
मुखमा कालो मोसो दलेको पनि देखियो
देशमा बलवान् सरकार भएर पनि
जनतासामु पूरै गलेको पनि देखियो
हाम्रो पालामा प्रशस्त देखियो हुँदाहुँदा
अग्रगामी कदम टलेको पनि देखियो।
अक्षर सङ्ख्या : १५
अनुप्रास : अलेको
शेष अनुप्रास : पनि देखियो
अभ्यास : चारु अभ्यास पाठशाला
वि.सं.२०८२ फागुन १६ शनिवार ०६:०४ मा प्रकाशित
