Sansar News
उत्तम विचार,नुवाकोट
छोडी गइन् ममाथि शङ्का गरेर कोही
आइन् यता नजिकमा डेरा सरेर कोही
यो सृष्टि दैवको हो पाइन्न जान्न भन्नै
फुल्नै छ कोपिलामै जान्छन् झरेर कोही
यो भाग्यको नदीमा नौका हजार हुन्छन्
डुब्छन् एकाध नाउ जान्छन् तरेर कोही
आहार धेर मल हो भन्दै घटाउने छन्
छन् टन्न खान खोज्ने धोक्रो भरेर कोही
मर्ने र जन्मिनेको केही हुँदैन टुङ्गो
भरखर दुरुस्त मान्छे जान्छन् मरेर कोही
बहर : मुजारे मुसम्मन अखरब
अर्कान : मफ्ऊलु , फाइलातुन् , मफ्ऊलु , फाइलातुन्
वजन- २२१ – २१२२ – २२१ – २१२२
काफिया : अरेर
रदिफ : कोही
अभ्यास : परिश्रमी पाठशाला
वि.सं.२०८२ फागुन १६ शनिवार ०६:०० मा प्रकाशित
