हामी सबैकाे संसारन्यूज

काठमाडौँ । चन्द्रागिरीको काखमा अवस्थित जेसीस इन्टरनेसनल बोर्डिङ सेकेन्डरी स्कुलको प्राङ्गणमा सञ्चालित दुई दिवसीय ‘अभिभावक योग शिविर’ एक आध्यात्मिक उत्सवका रूपमा सम्पन्न भएको छ ।

‘जेसीस आनन्दम योग यात्रा’ नाम दिइएको विशेष अनुष्ठानमा बालबालिका केवल विद्यार्थी मात्र रहेनन्, उनीहरू ‘योग-गुरु’का रूपमा प्रस्तुत भएर उपस्थित सबैको चेतनालाई जागृत गराएका थिए।

योग-साधना र बाल प्रशिक्षकको दिव्य अनुभूति विश्व शान्ति तथा आध्यात्म विज्ञान समाज (GSPSS) बाट अन्तर्राष्ट्रिय प्रमाणीकरण प्राप्त बाल योग प्रशिक्षकहरू दिवेन्शा चौधरी र प्रास्ना आचार्यले आफ्नो यौगिक कौशल प्रदर्शन गर्दा उपस्थित जनसमुदाय मन्त्रमुग्ध बनेका थिए ।

सूक्ष्म व्यायामदेखि कठिन आसन र प्राणायामको लयबद्ध प्रस्तुतिले विद्यालयको वातावरणलाई नै ‘तपोवन’मा परिणत गरिदिएको थियो।

बाल प्रशिक्षक दिवेन्शा चौधरीले स्वयं मञ्चमा उभिएर आफ्ना अभिभावकहरूलाई योग सिकाउन पाउँदा साक्षात् ‘शिवत्व’को अनुभव भएको सुनाइन् ।

उनले भनिन्, “स्वास र शरीरको सन्तुलन मिलाउँदै गर्दा हामीले केवल आसन मात्र सिकाएनौँ, आफ्ना माता-पिताको अनुहारमा एउटा दिव्य शान्ति देख्यौँ । यो अवसर प्रदान गर्ने विद्यालय र हाम्रा मेन्टरहरूप्रति हामी ऋणी छौँ ।”

दिवेन्शा मात्र ९ वर्ष ४ दिनको कलिलो उमेरमा, १६ अगस्ट २०२५ मा अन्तर्राष्ट्रिय मान्यता प्राप्त योग गुरुको परिचय बनाएकी थिइन ।

डाक्नेश्वरी नगरपालिका-७, सप्तरी निवासी उनी जिलाकै एक मात्र सबैभन्दा कान्छी मान्यता प्राप्त बाल योग प्रशिक्षक हुन ।

योग शिविरको दोस्रो दिन भने दिवेन्शालाइ सोही बिधालयमा अध्यनरत प्रास्ना आचार्यले योग प्रशिक्षणमा सहयोग गरेकी थिइन् ।

चन्द्रागिरीकै ‘संस्कार र साधना’को केन्द्र चन्द्रागिरी नगरपालिका भित्रका शैक्षिक संस्थाहरूमध्ये जेसीज इन्टरनेसनल सबैभन्दा धेरै ‘सर्टिफाइड इन्टरनेसनल योग प्रशिक्षक’ उत्पादन गर्ने ‘योग-पाठशाला’ बन्न सफल भएको छ ।

न्यून शुल्कमा विश्वस्तरीय शिक्षाका साथै बालबालिकाको सर्वाङ्गीण विकास (शारीरिक, मानसिक र आध्यात्मिक)लाई मूल मन्त्र बनाउँदै यस विद्यालयले ‘दिव्य संस्कारको आधुनिक मन्दिर’को रूपमा आफ्नो उचाइ थपेको छ ।

गुरुहरूको मार्गदर्शन र विशेष सम्मान कार्यक्रममा आध्यात्मिक जगतका प्रकाण्ड व्यक्तित्वहरू दीपक पण्डित, दुर्गा पण्डित र महेश खनालको उपस्थिति थियो ।

विश्व शान्ति तथा आध्यात्म विज्ञान समाजका विशिष्ट सल्लाहकार एवं पूर्व महासचिव आदरणीय महेश खनालले बाल साधकहरूको प्रस्तुतिलाई ‘साधनाको कसी’मा जाँच्दै उनीहरूको प्रगतिका लागि मार्गदर्शक सुझावहरू प्रदान गरे ।

सोही अवसरमा विद्यालयका प्रथम अन्तर्राष्ट्रिय प्रमाणित योग प्रशिक्षक मिनेश बाबु न्यौपानेलाई विद्यालयले विशेष सम्मान गर्‍यो ।

उनले अन्यत्र स्थानान्तरण भए पनि आफ्नो ‘मातृ-संस्था’प्रतिको निष्ठा प्रकट गर्दै भने,— “जेसीज ले रोपेको योगको यो बीज आज विशाल वृक्ष बन्दै छ। यी नानीहरूको साधनाले भोलि विश्वमा शान्तिको बिगुल फुक्नेछ ।”

नेतृत्वको संकल्प र अभिभावकको हर्ष विद्यालयका संस्थापक सञ्चालक समिति अध्यक्ष नरेन्द्रराज श्रेष्ठ, प्राचार्य शिक्षाविद् सरोज महर्जन, ECA इन्चार्ज मञ्जु श्रेष्ठ र योग प्रोग्राम मेन्टर त्यागी अनिल मारुतले बाल प्रशिक्षकहरूलाई उनीहरूको सफलतापूर्वक नेतृत्वका लागि सम्मान पत्र र मायाको चिनो प्रदान गरे ।

प्राचार्य सरोज महर्जनले भने, “हामी केवल अक्षर चिनाउने विद्यालय होइनौँ, हामी त जीवन जिउने ‘दिव्य मार्ग’ प्रशस्त गर्ने संस्कारशाला हौँ ।”

एक सहभागी अभिभावकले भने,— “मेरो बच्चाले मलाई प्राणायाम सिकाउँदै गर्दा मलाई आफ्नो घर नै एक आध्यात्मिक केन्द्र जस्तो लाग्यो । जेसीज ले हाम्रा छोराछोरीलाई ‘चरित्र र चेतना’ दुवै दिएको छ ।”