Sansar News
बाबुराम गौतम, गुल्मी
१.
आयो ऋतुराज वसन्त
निर्जन पखेराको गुराँसले
दिलाउँछ खुसी अनन्त ।
२.
वसन्त ऋतु आयो
रुखको डालीमा बसेर
कोइलीले विरह गायो ।
३.
हुरीले खम्बा ढलाएथ्यो
बिजुली अवरुद्ध हुँदा
हाम्रो भेटघाट हराएथ्यो ।
४.
आँधीले उपद्रो गर्यो
ताण्डव रूप देखाएर
जनमनको चैन हर्यो ।
५.
उजाड बनायो करेसाबारी
पानीसँगै परेको असिनाले
थिचिदियो भएजति तरकारी ।
६.
हानिनोक्सानी गर्यो तुलफूल
मानवीय क्रियाकलापले गर्दा
वातावरण बनिरहेछ प्रतिकूल ।
७.
नबसौं चिन्तामा डुबेर
दुईदिने यो जिन्दगीमा
मायाप्रीति गाँसौं खुलेर ।
८.
नहेर शङ्का छरी
आऊ माया लगाऊँ
सद्भाव नडग्ने गरी ।
९.
आतुर बन्दैछ मन
तिम्रो दर्शन नपाउँदा
सिथिल हुँदैछ बदन ।
१०.
अशान्त मस्तिष्क लिएर
घचेट्नु नपरोस् रजनी
यादको घुट्को पिएर ।
वि.सं.२०८२ चैत १४ शनिवार ०५:४८ मा प्रकाशित
