Sansar News
वसन्त अनुभव
वसन्तविहार, घोराही दाङ
१.
परिस्थिति रहोस् कस्तै
प्रगाढ रहोस् सम्बन्ध
आँखा, आँसुको जस्तै ।
२.
अटुट सम्बन्धको खानी
सम्बन्धको बलियो उदाहरण
नङ, मासुको कहानी ।
३.
भएर मनदेखि टाढा
कसरी चल्छ सुमधुर ?
हाम्रो जिन्दगीको गाडा ।
४.
चढ्छन् करोडौँको कार
सर्वहाराका प्रतिनिधि उनी
राम्रै छ बन्दव्यापार ।
५.
लुछेर निमुखाको मासु
निर्लज्ज व्वाँसा ती
झार्छन् गोहीको आँसु ।
६.
देखावटी सुकेको आँत
बाहिर बडेमानको दाह्रो
अन्तर्यमा चपाउने दाँत ।
७.
हुँदैन कसैको फिक्री
हिराको मोदक हातमा
परेपछि सुनको सिक्री ।
८.
सम्झन्छ्न् मूर्ख हरपल
जितेर भुल्छ्न् नेता
रुवाउँछन् जनता पलपल ।
९.
पाइँदैन खोज्दा काम
कसरी छ्ल्नु यहाँ ?
अभावको चर्को घाम ।
१०.
गरिबी बाध्यताको करमा
परदेश पुग्छन् युवाहरू
कति फर्कन्छ्न् बाकसमा ।
वि.सं.२०८३ वैशाख १९ शनिवार ०८:०१ मा प्रकाशित
