हामी सबैकाे संसारन्यूज

हृषीकेश बराल पोखरा -२६ , कास्की

भाषा चल्छन्,गति यति लिई,अर्थ सौन्दर्य थप्छन्
थप्छन् उस्तै,स्वर लय मिठा,दिव्य आनन्द दिन्छन् ।
दिन्छन् बोल्छन्,कवि हृदयमा,काव्यको कल्पनामा
लागौँ हामी,अब सब जना छन्दको साधनामा ।।१

हावा चल्दा,पनि गगनमा,वर्णले छन्द बोल्छन्
बोल्छन् सुन्छौँ,मधुर लय छन्,बुझ्छ जो नित्य झुम्छन् ।
झुम्छन् सिर्जी,विविध कविता,देवको प्रार्थनामा
लागौँ हामी,अब सब जना,छन्दको साधनामा ।।२

बाजा बज्दा,नभचरहरू,छन्दमैँ नाच्न खोज्छन्
खोज्छन् यस्तो,सुललित कला,गाउने शिल्प रोज्छन् ।
रोज्छन् विद्वान्,प्रवचन दिँदा,भक्तको चाहनामा
लागौँ हामी,अब सब जना,छन्दको साधनामा ।।३

धर्ती घुम्छिन्,क्रमिक जहिल्यै,छन्दको ताल रोजी
रोजी आफैँ,ऋतु बदलिए,वृत्तको भाव खोजी ।
खोजी गर्दा,प्रिय पद अरू,छैन यो सम्झनामा
लागौँ हामी,अब सब जना,छन्दको साधनामा ।।४

झर्ना खोला,दह नद नदी,तालमा छन्द हुन्छन्
हुन्छन् भन्ने,अवगत गरे,पद्यमा काव्य रच्छन् ।
रच्छन् हाम्रा,सुकवि सबले,सृष्टिको अर्चनामा
लागौँ हामी,अब सब जना,छन्दको साधनामा ।।५

काव्यात्माका,नजर जसमा,पर्दछन् काव्य बन्छन्
बन्छन् वाच्छन्,श्रवण गरिँदा,भित्रका भाव भन्छन् ।
भन्छन् जानी,विषय मनका,बग्दछन् भावनामा
लागौँ हामी,अब सब जना,छन्दको साधनामा ।।६

छन्द : मन्दाक्रान्ता
गण : म – भ – न – त – त – गु – गु
गण सङ्केत : SSS – SII – III – SSI – SSI – S – S