हामी सबैकाे संसारन्यूज

रामशरण न्यौपाने “पाँचघरे”
भक्तपुर

आमा हुन् घरकी दियो प्रखर जो लक्ष्मीसरी चञ्चल
आमाको ममता पवित्र छ झनै मानिन्छ गङ्गाजल
भोगुन् जीवन सान मानसितले हाँसीखुसी हुन् सब
नेपाली घरमा कतै कहरमा “आमा” नरोउन् अब॥१

आमाको महिमा त शास्त्रबिचमा देखिन्छ उच्चो अति
कौशल्यासित रामले अघि अहो! आस्था बढाए कति?
आमाकै जय गर्न युद्धपथमा लागे स्वयम् केशव
नेपाली घरमा कतै कहरमा “आमा” नरोउन् अब॥२

त्यक्ता दीन कुनै बलात्कृत नहुन् अन्यायमा शोषित
देवीको प्रतिमूर्तिझैँ घरघरै “आमा” बनुन् पूजित
शोभा हुन् घरकी मुमा सकलकी ऊर्जा तथा वैभव
नेपाली घरमा कतै कहरमा “आमा” नरोउन् अब॥३

निर्मोही अति नै बनेर घरका छोरा बुहारीहरू
पीडा धेर खपेर बस्न नसकी खोजेर बाटो अरू
त्यो वृद्धाश्रमभित्र भोग्न नपरोस् बाँच्दै हरे! रौरव
नेपाली घरमा कतै कहरमा “आमा” नरोउन् अब॥४

हुन् सन्तान समस्त नै श्रवणझैँ माता पिता खातिर
आफैँ पर्दछ बन्न भोलि सबले माता पिता आखिर
गर्दा पूजन जन्मभूमि जननी सो हुन्छ हो गौरव
नेपाली घरमा कतै कहरमा “आमा” नरोउन् अब॥५

छन्द : शार्दूलविक्रीडित
गण : म – स – ज – स – त – त – गु
सङ्केत : SSS – IIS – ISI – IIS – SSI – SSI – S