हामी सबैकाे संसारन्यूज

स्पेनसँग १–० गोलअन्तरले पराजित भएपछि अर्जेन्टिनाले विश्वकप उपाधि जोगाउने सपना गुमाएको छ। यस हारसँगै विश्व फुटबलका महान् खेलाडी लियोनेल मेस्सीको सम्भावित अन्तिम विश्वकप यात्रा पनि समाप्त भएको हुन सक्ने अनुमानले देशभरका समर्थकहरू भावुक बनेका छन्।

फाइनल खेल सकिएलगत्तै अर्जेन्टिनाको राजधानी ब्युनस आयर्सका बार, क्याफे र सार्वजनिक चोकहरूमा खेल हेर्न भेला भएका हजारौँ समर्थक स्तब्ध देखिए। खेल सुरु हुँदा उत्साह र आशाले भरिएका उनीहरू अन्तिम सिट्टीसँगै निराशा र भावनामा डुबेका थिए। धेरै समर्थकले उपाधि गुमाउनु भन्दा पनि अब मेस्सीलाई विश्वकपमा फेरि देख्न नपाइने सम्भावनाले बढी दुःख लागेको बताएका छन्।

२२ वर्षीय वास्तुकला विद्यार्थी क्यामिलो चिचेरोले मेस्सीको विश्वकप यात्रा यतिमै टुंगिएको स्वीकार गर्न कठिन भएको बताए। उनले मेस्सीले आफ्नो करिअरमा विश्वकपसहित सबै प्रमुख उपाधि जितिसकेको तथ्यले केही सान्त्वना दिएको प्रतिक्रिया दिए।

उनका साथी तथा कानूनका विद्यार्थी जुआन सेन्जले भने, “हामी मेस्सीकै युगमा हुर्कियौँ। यो केवल एक खेलाडीको बिदाइ होइन, एउटा युगको अन्त्य हो,” भन्दै भावुक प्रतिक्रिया व्यक्त गरे।

हारका बाबजुद अर्जेन्टिनाका समर्थकहरूले टोलीप्रतिको सम्मान भने कायम राखेका छन्। राजधानीको प्रसिद्ध ओबेलिस्क क्षेत्रमा हजारौँ समर्थक भेला भएर खेलाडीहरूको हौसला बढाएका थिए। टोली स्वदेश फर्किएपछि भव्य स्वागत गर्ने प्रतिबद्धता पनि उनीहरूले जनाएका छन्।

अर्जेन्टिनाका राष्ट्रपति जेभियर मिलेईले सामाजिक सञ्जाल एक्समार्फत खेलाडीहरूले अन्तिम क्षणसम्म संघर्ष गरेको भन्दै उनीहरूलाई धन्यवाद दिएका छन्।

फाइनलअघि अधिकांश समर्थक लगातार कठिन जितका आधारमा अर्जेन्टिना पुनः विश्व च्याम्पियन बन्नेमा विश्वस्त थिए। राष्ट्रिय झण्डा र नीलो–सेतो जर्सी लगाएर उनीहरू बिहानैदेखि विभिन्न सार्वजनिक स्थानमा खेल हेर्न भेला भएका थिए। तर खेल अघि बढ्दै जाँदा उत्साह विस्तारै तनावमा परिणत भएको थियो।

दोस्रो हाफ र अतिरिक्त समयमा समर्थकहरू प्रार्थना, चिन्ता र अपेक्षामा डुबेका थिए। एन्जो फर्नान्डेज रातो कार्ड पाएर मैदानबाट बाहिरिएपछि अर्जेन्टिनाको दबाब अझ बढ्यो। अन्ततः अतिरिक्त समयमा फेरान टोरेसले गरेको निर्णायक गोलले अर्जेन्टिनाको उपाधि रक्षा अभियान समाप्त गरिदियो।

पराजयपछि केही समर्थकले टोलीको रणनीति, खेलाडी छनोट र निर्णायकको निर्णयप्रति असन्तुष्टि जनाए पनि अधिकांशले खेलाडीहरूले अन्तिमसम्म पूरा समर्पणका साथ खेलेकाले उनीहरूप्रति गर्व रहेको बताएका छन्।

६२ वर्षीय सेवानिवृत्त एबेल टोरेसले कठिन परिस्थितिमा पनि अन्तिमसम्म लड्ने अर्जेन्टिनाको चरित्र टोलीले मैदानमा देखाएको बताए।

मेस्सीको जन्मस्थान रोजारियोमा पनि सयौँ समर्थक भेला भएर आतसबाजीसहित टोली र मेस्सीलाई सम्मान व्यक्त गरेका छन्। स्थानीय समर्थकहरूले विश्वकप गुमाए पनि मेस्सीले अर्जेन्टिनालाई विश्व फुटबलको शिखरमा पुर्‍याएको योगदान इतिहासमा सधैँ अमर रहने बताएका छन्।