हामी सबैकाे संसारन्यूज

काठमाडौं । चिकित्सकमाथि भएका आक्रमणका घटनाको विरोधमा दुई दिनदेखि अवरुद्ध स्वास्थ्य सेवा सरकार र नेपाल चिकित्सक संघबीच भएको पाँच बुँदे सहमतिपछि बुधबार साँझदेखि देशभर पुनः सञ्चालनमा आएको छ।

वीरगञ्जस्थित नारायणी अस्पतालमा चिकित्सकमाथि भएको कुटपिट र अस्पतालमा भएको तोडफोडको घटनापछि नेपाल चिकित्सक संघले देशभर आकस्मिकबाहेकका सेवा बन्द गर्दै आन्दोलन थालेको थियो। सहमतिसँगै ओपीडीसहित नियमित स्वास्थ्य सेवा पुनः सञ्चालनमा आएको छ।

सरकार र चिकित्सक संघबीच भएको पाँच बुँदे सहमतिअनुसार नारायणी अस्पताल घटनामा संलग्नमाथि स्वास्थ्यकर्मी तथा स्वास्थ्य संस्थाको सुरक्षासम्बन्धी ऐनअनुसार कानुनी कारबाही प्रक्रिया अघि बढाइने भएको छ। साथै, स्वास्थ्यकर्मीको सुरक्षासम्बन्धी कानुन संशोधनका लागि आवश्यक विधेयक संसद्को चालु अधिवेशनमा दर्ता गर्ने, चिकित्सक संघको सहभागितामा कानुनी तथा नीतिगत सुधारका लागि कार्यदल गठन गर्ने, विगतका सहमतिहरूको कार्यान्वयन अनुगमन गर्न संयुक्त संयन्त्र बनाउने तथा आन्दोलनका सबै कार्यक्रम फिर्ता लिएर स्वास्थ्य सेवा तत्काल सुचारु गर्ने सहमति भएको छ।

सहमतिपछि नेपाल चिकित्सक संघले आन्दोलन स्थगित गर्दै देशभरका सरकारी, निजी तथा सामुदायिक अस्पतालमा नियमित सेवा सञ्चालन गर्न सदस्य चिकित्सकलाई आग्रह गरेको जनाएको छ।

सहमतिपछि स्वास्थ्यकर्मीहरू काममा फर्किएका छन् भने अस्पताल प्रशासनले सेवाग्राहीलाई नियमित रूपमा स्वास्थ्य सेवा उपलब्ध गराउन सबै सेवा सञ्चालनमा ल्याएको जनाएको छ। साथै, भविष्यमा यस्ता घटना दोहोरिन नदिन अस्पतालमा सुरक्षा व्यवस्था थप प्रभावकारी बनाउने विषयमा पनि छलफल भएको बताइएको छ।

यसअघि नारायणी अस्पतालमा बिरामीको मृत्यु भएपछि आक्रोशित समूहले चिकित्सकमाथि कुटपिट तथा अस्पतालमा तोडफोड गरेपछि चिकित्सकहरूले आन्दोलन सुरु गरेका थिए। उक्त घटनाले देशभरका अस्पतालमा स्वास्थ्य सेवा प्रभावित भएको थियो।