हामी सबैकाे संसारन्यूज

११ साउन, काठमाडौं ।पुष्पलाल अध्ययन समाजले ३९ औं स्मृति दिवस मनाएको छ ।  पुष्पलाल अध्ययन समाजको कार्यालय धोविधारामा मंगलबार आयोजित कार्यक्रममा पुष्पलालको ३९ औ स्मृति दिवस मनाएको हो ।
पुष्पलाल अध्ययन समाजका अध्यक्ष लोककृष्ण भट्टराईको अध्यक्षतामा सम्पन्न भएको उक्त स्मृतिसभामा वक्ताहरुले नेपालका कम्युनिष्ट पार्टीहरुलाई एक बनाउनका लागि पुष्पलालको विचार धारा अपनाउनु पर्ने बताएका थिए ।

सोहि अवसरमा नेपाल कम्युनिष्ट पार्टीका वरिष्ठउपाध्यक्ष लोकनारायण सुवेदीले पुष्पलालको फोटो पूजा गर्ने गतिबिधि मात्र भएको र देशमा ६ जना कम्युनिष्ट प्रधानमन्त्री बनेपनि जनताका समस्या ज्यूँका त्यूँ रहेको बताएका थिए । उनले अहिले पनि जनताको गाँस बास कपासको व्यवस्थाका लागि पुष्पलालको नयाँजनवादी क्रान्तिको विचारधारालाई अगाडि बढाउन जरुरी रहेको बताए ।
सुवेदीले पुष्पलाललाई आफ्नो स्वार्थ अनूकुल ढालेर बजारको बस्तु बनाएर प्रयोग गर्ने विकृतिविरुद्ध पुष्पलालका अनुयायीहरु एकजुट हुनुपर्ने बताए ।
त्यस्तै अर्का वक्ता वोर्ण कार्कीले कम्युनिष्ट राजनीति मियो विनाको दाइँजस्तो भएर चलेको बताउदै कम्युनिष्ट आन्दोलनले अब जनतालाई केही दिन्छ भन्ने बेलामा ती उपलब्धिहरुमा किरा लागेजसरी काम नलाग्ने भएको बताए ।

कार्यक्रममा नेपाल कम्युनिष्ट पार्टी माक्र्सवादीका अच्युत ज्ञवाली, बेणीमाधव भट्टराई, हरिहर खनाल, निलकण्ठ तिवारी, पूर्णकला भट्टराई, युवराज भण्डारी, मुकुन्द आर्याच, रवि खनाल लगायतले पुष्पलालको फोटोमा माल्यापर्ण गरी पुष्पलालका विचारलाई अगाडि बढाउनु पर्ने बताएका थिए ।

कौशल अधिकारीको संचालन र चन्दा थापाको स्वागत मन्तव्य रहेको उक्त स्मृति सभामा अध्यक्ष लोककृष्ण भट्टराईले जनताको मुक्तिका लागि अझै पनि आन्दोलनको आवस्यकता रहेको बताएका थिए । उनले रेमिट्यान्स इकोनोमिले यथास्थितिवाद काम नलाग्ने भएको बताउँदै अब देश र जनताका लागि सबैले त्याग गर्नुपर्ने बेला आएको बताएका थिए ।
अध्यक्षले देशभरीका पुष्पलालका अनुयायीहरु एकजुट भएर अगाडि बढ्नुपर्ने बताएका थिए ।