हामी सबैकाे संसारन्यूज

२३ मंसिर, ललितपुर  : प्रदेशसभा क्षेत्र नं ३ (क) र ३ (ख) दुवैमा वाम गठबन्धनका उम्मेदवार विजयी भएका छन् ।

क्षेत्र ३ (क) मा नेकपा (माओवादी केन्द्र)का उम्मेदवार राजकाजी महर्जन १४ हजार ६२४ मत ल्याएर विजयी हुनुभएको छ । उहाँका निकटतम प्रतिष्पर्धी नेपाली काँग्रेसका उम्मेदवार नवराज महतले १० हजार ११८ मत पाउनुभएको छ ।

प्रदेशसभा क्षेत्र नं ३ (ख) मा ११ हजार ७०१ मत ल्याएर नेकपा (एमाले)का उम्मेदवार जीवन खड्का विजयी हुनुभएको छ । उहाँका निकटतम प्रतिष्पर्धी नेपाली काँग्रेसका उम्मेदवार शिवराम बानियाँले आठ हजार ६९१ मत ल्याउनुभएको छ ।

जिल्लामा अहिलेसम्म प्रतिनिधिसभा क्षेत्र नं २ र ३ मा बाम गठबन्धनका उम्मेदवार विजयी भइसक्नुभएको छ । प्रदेशसभा २ (क) र २ (ख) र १ (क) मा वाम गठबन्धनका उम्मेदवारले अग्रता लिइरहनुभएको छ । प्रदेशसभा १ (ख) को मतगणना अहिलेसम्म शुरु भएको छैन ।

प्रतिनिधिसभातर्फ, क्षेत्र नं १ मा नेकपा (एमाले)का नवराज सिलवालले २५ हजार ७३१ मतले अग्रता लिइरहनुभएको छ । नेपाली काँग्रेसका उम्मेदवार उदय शमशेर राणाले १९ हजार ८२६ मतले उहाँलाई पछ्याइरहनुभएको छ ।