रमेश गिरी
भक्तपुर, १० पुस । सूर्यविनायक नगरपालिका १ सिरुटारका तीन युवाले रु. ६० लाख रुपैयाको लागतमा निर्माण गरेको फुटसल आजबाट संचालनमा आएको छ ।
कन्ट्रिसाइड रिक्रियशन सेन्टर फुटसलको आज नवनिर्वाचित प्रतिनिधीसभा सदस्य महेश बस्नेतले उद्घाटन गर्नुभएको हो ।
कार्यक्रममा बस्नेतले अहिलेका युवा वर्गलाई बिदेश पलायन, बिकृति, बिसंगति लाग्नबाट रोक्नु पर्ने बताउँदै विदेश जाने युवाले आफ्नै गाउँमा सुरु गर्ने यस्ता व्यवसायले युवालाई बिकृति, बिसंगतिमा लाग्न समेत रोक्ने बताउनुभयो । युवा वर्ग अगाडि बढे आफ्नो ठाउँको विकास गर्न पाँचवर्ष पनि नलाग्ने बताउँदै उहाँले युवाले गर्ने प्रत्येक विकासका काममा आफ्नो सहयोग रहने बताउनुभयो ।
कार्यक्रममा नवनिर्वाचित प्रदेशसभाका सदस्य शशीजंग थापाले उपत्यकामा रंगशालाको अभाव खडकिरहेको अबस्थामा फुटसलले केही हदसम्म त्यसको आवश्यकतालाई पुरा गरेको बताउनुभयो । उहाँले दधिकोटमा रंगशाला बनाउने प्रस्ताव सकारात्मक रुपमा अगाडि बढेको र यसको प्रक्रियालाई सरकार समक्ष लगिएकाले यसलाई पुरा गथर्न सबै पक्षबाट पहल हुनुपर्नेमा जोड दिनुभयो ।
त्यसअवसरमा ललितपुरको चाँगाथली युवा क्लबका अध्यक्ष बाबुराजा महर्जनले खेलकुद प्रति युवाको आकर्षण बढ्दै गईरहेको अबस्थामा प्रत्येक प्रदेशमा एउटा रंगशाला आवश्यकता भएकाले यसतर्फ ध्यान दिनुपर्ने भनाई राख्नुभयो । फुटसल संचालक समितिका अध्यक्ष धनन्जय श्रेष्ठ युवा वर्गको फुटसलप्रति आकर्षण बढ्दै गएको र युवा वर्गलाई मनोरञ्जन दिन युवाहरुको लगानीमा फुटसल संचालनमा ल्याएको बताउनुभयो ।
संचालकद्धय सुदिप राउत र रुपक थापाले युवा वर्गको शारीरिक, मानसिक स्वास्थ्यको विकास गर्ने र फुटसल खेलको विकास गर्ने उदेश्यले फुटसल संचालनमा ल्याएको बताउनुभयो ।
वि.सं.२०७४ पुस १० सोमवार १४:४० मा प्रकाशित