हामी सबैकाे संसारन्यूज

उर्लाबारी (मोरङ) । स्थानीय बाहुनीमा सम्पन्न पूर्वाञ्चलस्तरीय एम्ब्रियो कप फुटबल प्रतियोगिताको उपाधि बेलबारी फुटबल क्लबले हात पारेको छ ।

विहिबार (२० असोज) भएको फाइनल प्रतिस्पर्धामा बेलबारी आयोजक एम्ब्रियोलाई ३–० गोल अन्तरले पराजित गर्दै रु ५५ हजार सहितको उपाधि हात पार्न सफल भएको हो । उपविजेता बनेको आयोजकले रु ३५ हजारसहित कप प्राप्त गरेको छ । राष्ट्रिय खेलाडी समेत सम्मिलित दुवै टोलीको खेल प्रतिस्पर्धात्मक र रोमाञ्चक भई पहिलो हाफ गोलरहित बराबरी भएको थियो । दोस्रो हाफको १७औँ मिनेटमा बेलबारीका सञ्जीव राईको पासमा विनोद अधिकारीले गोल गरेर आफ्नो टोलीलाई अग्रता दिलाएका थिए ।

त्यसलगत्तै २१औँ मिनेटमा बेलबारीका समिर सुनुवारले पुनः १ गोल थपेर आफ्नो टोलीलाई जितको सुनिश्चित बनाएका थिए । खेलको इन्जुरी टाइममा नगेन्द्र लिम्बूले अर्काे गोल थप्दा ३–० को स्थितिमा बेलबारी जित हासिल गर्न सफल भयो । समापन कार्यक्रममा राष्ट्रिय खेलकुद परिषद्का सदस्य शम्भुप्रसाद आचार्यले पुरस्कार प्रदान गर्नुभएको थियो ।