‘दुःखसुखको जिन्दगीमा जिलाउँदै जानुपर्छ
मनैदेखि मनको नाता मिलाउँदै जानुपर्छ
हामीबीचको सिमानामा किला ठोक्नेलाई
दुई मुटु एक बनाई हिलाउँदै जानुपर्छ’
हाइकु विधामा परिचित ऋषि बरालको मुक्तक ‘पैतालाका डोबहरु’ बुधबार विमोचन भएको छ । ती मुक्तकमा विशेषगरी मायाप्रेम, देशभक्ति, वियोग र मातृशोकका विषयलाई समेटिएको छ ।
नेपाल मुक्तक प्रतिष्ठानको आयोजनामा यहाँ बरालको मुक्तक विमोचन गर्दै साहित्यकार रत्नशमशेर थापाले बरालको मुक्तक र हाइकु अन्तर्राष्ट्रियस्तरको भएको बताउँदै अहिलेको सन्दर्भमा मुक्तकको भविष्य राम्रो भएको विचार राखेका थिए ।
प्रा डा खगेन्द्रप्रसाद लुइँटेलले बरालका मुक्तक पठनीय भएको तर नेपाली भाषाको शुद्धतालाई विशेष ध्यान दिनुपर्ने बताए । साहित्यकार रामकुमार पाँडेले नेपाललाई चिनाउन साहित्यकारको भूमिका मुख्य रहने जापान, अमेरिकालगायत देशमा जस्तो नेपालमा भएका पनि प्रतिष्ठानले पर्याप्त रुपमा साहित्यका विधाहरुको अनुसन्धान गर्नुपर्नेमा जोदिएका थिए ।
स्रष्टा बरालले आफ्नो बढी झुकाव हाइकुमा भए पनि मुक्तक पनि लेखिरहने जानकारी दिनुभयो ।
‘मन भत्केर दुःख भुल्न थोरै पिएका बेला
नआऊ झस्काउन झुत्रो मन सिएका बेला
मुटु सम्झी जीवन दिएँ केवल तिम्रै लागि
बाँकी भए लैजाऊ, मुटु झिकी जिएका बेला’
वि.सं.२०७५ असोज ४ बिहीवार ०८:०३ मा प्रकाशित