हामी सबैकाे संसारन्यूज

७ असोज, काठमाडौं । सार्वजनिक यातायातको भाडा बृद्धि भएको छ । यातायात व्यवसायीहरूल दशैँ अगाडीको अग्रिम बुकिङ रोकेपछि सरकारले १० प्रतिशत भाडा वृद्धि गर्न सहमत भएका थिए ।
ईन्धनको मूल्य वृद्धि भएपछि व्यवसायीहरुले सहमति गरेर पनि अग्रिम बुकिङ खोल्ने निर्णयबाट पछि हटेका थिए ।

शनिबार भौतिक पूर्वाधार तथा यातायात व्यवस्था मन्त्रालयमा भएको वार्तामा हालै भएको इन्धनको मूल्यबृद्धिलाई मुख्य आधार मानेर भाडादर १० प्रतिशत बढाउने सहमति भएको नेपाल यातायात व्यवसायी महासंघका महासचिव सरोज सिटौलाले जानकारी दिए ।

सहमति अनुसार आईतबार देखि नै नयाँ भाडादर लागू हुने छ ।
यस्तै बैठकमा समय सापेक्ष भाडादर कायम गर्न दुई महिनाभित्र प्रतिवेदन दिने गरी समिति गठन गर्ने र मंसिर २९ सम्म भाडा समायोजन गर्ने सहमति पनि भएको छ ।

वार्तामा यातायात व्यवसायी संघ तथा समितिहरुको रोक्का रहेको बैंक खताबाट समितिको अनिवार्य दायित्वभित्र पर्ने खर्चहरु भुक्तानी गर्ने व्यवस्था मिलाउने वातावरण समेत तयार गर्ने समझदारी बनेको यातायात मन्त्रालयका सचिव मधुसुदन अधिकारीले जानकारी दिए । शनिबार सहमति भएपनि अग्रिम बुकिङ कहिले खोल्ने विषयमा भने यातायात व्यवसायीहरुले छलफल गरेर नयाँ मिति तोक्ने समझदारी बनेको महासंघका महासचिव सिटौलाले जानकारी दिए । “कहिले देखि अग्रिम बुकिङ खोल्ने निर्णय भईसकेको छैन्”, सिटौलाले भने, “यातायात व्यवस्था विभागले भाडा वृद्धिसहितको पत्रपठाएपछि सोमबार केन्द्रिय समितिको बैठकबाट यस विषयको टुंगोमा पुग्छौँ ।”
यस अघि भदौ ३१ गते यातयात व्यवस्था विभाग र व्यवसायीहरुबीच असोज ५ देखि अग्रिम बुकिङ खोल्ने समझदारी बनेको थियो । तर असोज २ देखि पेट्रोलियम पदार्थको मूल्यमा भएको बढोत्तरीका कारण व्यवसायीहरुले पुरानै भाडादरमा अग्रिम बुकिङ नखोल्ने अडान राखेका थिए ।