हामी सबैकाे संसारन्यूज

६ मङ्सिर,साना ।  संयुक्त राष्ट्रसङ्घका विषेश दूत मार्टिन ग्रिफथ शान्ति वार्ताको तयारीका लागि यमन आइपुगेका छन् ।

विद्रोहीसँगको वार्ताका लागि वातावरण बनाउन उनी बुधबार यमनको राजधानी साना आइपुगेका समाचारमा जनाइएको छ ।

उनले राजधानी सानामा सरकारी पक्षलाई भेट्नु हुनेछ भने विद्रोही पक्षलाई अर्को महत्वपूर्ण शहर होडेडा शहरमा भेट्ने कार्यक्रम रहेको छ ।

राष्ट्रसङ्घीय सुरक्षा परिषद्को बैठकमा गत शुक्रबार उनले यमन आउने आफ्नो योजनाका बारेमा जानकारी गराएका थिए ।

उनले एक हप्ताभित्रमा स्विडेनमा यमनको सरकारी पक्ष र विद्रोही पक्षका बीचमा वार्ता गराउने तयारी गरेका छन् ।

शान्ति वार्ता गराउने उनको गृहकार्य अनुसार नै केहीदिन अगाडि यमनको हुथी विद्रोही समूहले विभिन्न आक्रमण रोक्ने घोषणा गरेको छ । त्यस लगत्तै यमनको अन्तर्राष्ट्रिय मान्यता प्राप्त सरकारले पनि वार्तामा बस्न तयार रहेको सोमबार घोषणा गरेको छ ।

राष्ट्रसङ्घका विशेष दूत ग्रिफिथले गत शुक्रबार अर्को साता विद्रोहीको नियन्त्रणमा रहेको सानाको भ्रमण गर्ने जानकारीमा आएलगत्तै हुथी समूहले युद्धविराम गर्ने घोषणा सार्वजनिक गरेको हो ।

सेप्टेम्बरमा पनि स्वीडेनमा शान्तिवार्ता गर्ने तय भए पनि अन्तिममा विद्रोही हुथी समूहले सुरक्षाको कारण देखाएका कारण वार्ता स्थगित भएको थियो ।

विद्रोहीले राजधानी साना र होडेडालाई सन् २०१४ मा नियन्त्रण गरेका थिए । अर्को वर्ष सरकारका पक्षबाट साउदी अरेबिया र यसका गठबन्धन मुलुकले सानामा हुथीविरुद्ध भीषण हमला गरेका थिए ।

यमन गृहयुद्धका कारण अहिलेसम्म हजारौँ मानिसको मृत्यु भइसकेको छ । विश्व स्वास्थ्य सङ्गठनका अनुसार, त्यसयता मात्र १० हजारभन्दा बढी व्यक्तिको मृत्यु भइसकेको छ । तर अधिकारकर्मीहरूले भने गृहयुद्धबाट मारिने व्यक्तिको सङ्ख्या यसको पाँच गुणा बढी भएको दाबी गरेका छन् ।