हामी सबैकाे संसारन्यूज

९ कात्तिक, काठमाडौँ । संयुक्त विद्यार्थी सङ्गठनले अख्तियार दुरुपयोग अनुसन्धान आयोगका निलम्बित प्रमुख आयुक्त लोकमानसिंह कार्कीविरुद्ध व्यवस्थापिका–संसद्मा दर्ता भएको महाअभियोग प्रस्ताव चाँडो प्रक्रियामा लैजान माग गर्दै सभामुख ओनसरी घर्तीलाई सोमबार ध्यानाकर्षण गराएको छ ।

विभिन्न १३ विद्यार्थी सङ्गठनले संयुक्त रुपमा सिंहदरबारस्थित सभामुखको कार्यकक्षमा गई सभामुख घर्तीलाई ध्यानाकर्षण गराएको हो ।

उक्त पत्रमा संवैधानिक निकायको प्रमुखको जिम्मेवारीमा रहेका कार्कीले शृङ्खलाबद्ध रुपमा संविधान, कानुन र विधिको पालना नगरेको उल्लेख गरिएको छ । त्यसैगरी मुलुकमा न्यायिक सर्वोच्चता कायम राखी विधिको शासन कायम गर्न सो प्रस्ताव अविलम्ब किनारा लगाउन माग गरिएको छ ।

सो पत्र बुझेपछि सभामुख घर्तीले जनताको सार्वभौम अधिकारलाई प्रयोग गर्ने संसद्मा दर्ता भइसकेको प्रस्तावलाई विधि र प्रक्रियाका माध्यमबाट अगाडि बढाउने विश्वास दिलाउनुभयो ।

संयुक्त विद्यार्थी सङ्गठनमा नेविसङ्घ, अनेरास्ववियु, अनेरास्ववियु (क्रान्तिकारी), राप्रपा नेपाल निकट राप्रविसं लगायत १३ वटा विद्यार्थी सङ्गठन सहभागी छन् । अनेरास्ववियुका सचिव आरसी लामिछानेले सो विषयमा जनप्रतिनिधिलाई दबाब सिर्जना गर्न विभिन्न कार्यक्रम गरिने जानकारी दिनुभयो ।

यसअघि सो सङ्गठनले नेकपा (एमाले) का अध्यक्ष केपी शर्मा ओली, नेपाली काँग्रेसका सभापति शेरबहादुर देउवालाई ध्यानाकर्षण गराएको छ ।