हामी सबैकाे संसारन्यूज

१४ फागुन, सोल, दक्षिण कोरिया । योन्हाप महिला कामदारलाई कम ज्याला दिने मुलुकमध्ये दक्षिण कोरिया अग्रस्थानमा रहेको अर्गनाइजेशन फर इकोनोमिक कोअपरेशन एण्ड डेभलपमेन्ट (ओईसीडी)ले तयार पारेको प्रतिवेदनमा सोमबार जनाइएको छ ।

सन् २०१७ को तथ्याङ्कअनुसार दक्षिण कोरियाका ३५.५ प्रतिशत महिला कामदारले मापदण्डभन्दा कम ज्याला भुक्तानी पाउने गरेको पाइएको छ ।

ओईसीडी राष्ट्रका कामदारको औसत आम्दानीभन्दा दुई तिहाइ कमी ज्याला भुक्तानी पाउने श्रमिकको आम्दानीलाई न्यूनतम आम्दानी भएको मानिन्छ ।

छतीस राष्ट्र सदस्य रहेको ओईसीडीमा दक्षिण कोरियाका महिलाको ज्याला भुक्तानी दरमा आर्थिक हिसाबले समृद्ध मानिने आठ मुलुकमध्ये सबैभन्दा अग्रस्थानमा रहेको सन् २०१७ को तथ्याङ्कले देखाएको छ । दुई नम्बरमा रहेको अमेरिकामा २९.०७ प्रतिशत महिलाको आम्दानी मापदण्डभन्दा कम रहेको पाइएको छ ।

सर्वेक्षणले सन् २०१६ मा २३ देशको तथ्याङ्कको तुलना गरेको थियो जसमा उक्त वर्ष ३७.२ प्रतिशत महिलाको आम्दानी मापदण्डभन्दा कम रहेको थियो । सन् २०१६ मा इजरायल ३०.४२ प्रतिशतसहित दोस्रो कम ज्याला भुक्तानी गर्ने स्थानमा रहेको थियो ।

सन् २०१७ मा ओईसीडी राष्ट्रका लागि औसत ज्याला भुक्तानी प्रतिशत दर २०.०१ प्रतिशत रहेको थियो ।

यद्यपि दक्षिण कोरियाका लागि सान्त्वनाको कुरा के छ भने महिलालाई निम्न ज्याला दिने मुलुकको अग्रस्थानमा नाम आए पनि आफ्नै पुराना रेकर्डलाई भने कोरियाले सुधार गरेको छ । सन् २००० मा यो दर ४५.७७ थियो भने २०११ मा ३८.२१ रहेको थियो । तर सन् २०१४ पछि महिलालाई दिइने ज्यालादरमा क्रमशः वृद्धि भएको छ ।

दक्षिण कोरियामा पुरूष कामदारलाई दिइने ज्याला भने सन् २०१७ मा औसतको नजिक रहेको देखिएको तथ्याङ्कमा छ ।

कम ज्याला पाउने पुरूष १४.३ प्रतिशत रहेको र आठ मुलुकमध्ये पाँचौँमा परेको छ । यो दर सन् २०१६ मा १५.३ प्रतिशत रहेको र मापन गरिएका २४ मुलुकमध्ये नवौँमा परेको थियो ।