हामी सबैकाे संसारन्यूज

२४ फागुन, काठमाडौं । बाराको करैयाँमाई गाउँपालिकाले बिहेमा दाइजो नलिने युवालाई प्रोत्साहन स्वरुप ५० हजार रुपैयाँ दिने भएको छ।
तराइमा रहेको व्याप्त दाइजो प्रथा र त्यसले छोरीपक्षका परिवारलाई दिइरहेको पीडालाई केही हदसम्म कम गर्नका लागि यस्तो योजना ल्याएको गाउँपालिका अध्यक्ष भुवनेश्वर धामीले बताएका छन् ।
उनका अनुसार यसले दाइजो प्रथालाई केही हदसम्म कम गर्छ कि, भन्ने हो । सदियौंदेखि जकडिएको दाइजो प्रथा हाम्रो यो अभियानले पूरै निर्मुल हुन्छ भन्न सक्तैनौं । यो जनचेतना जगाउने काम हो । अब छोरीहरु दाइजो प्रथाको सिकार हुनुहुँदैन भन्ने सोचले यस्तो योजना ल्याइएको अध्यक्ष धामीले संसारन्युजलाई बताए ।
१४ फागुनदेखि यस्तो निर्णय गरेको बताउँदै उनले भने, ‘यसले युवाहरुलाई कति छुन सक्छ थाहा छैन, तर गाउँपालिकाको कर्तव्य सोचेर जनचेतनास्वरुप यो काम गरेका हौं ।’
उनका अनुसार अहिले सम्म कुनैपनि युवाले यसका लागि ‘म, तयार छु,’ भनेर भनेका छैनन् । उनले भने, ‘तर स्थानीयले राम्रो सुरुवात भनेका छन् । हेर्दैजाउँ कस्तो हुन्छ ।’
उनका अनुसार गाउँपालिकामा रहेका दुई वटा प्लस टु, २ वटा निमावि र  १४ वटा प्रा.विमा छात्र र छात्राका लागि एउटै ड्रेस राखिएको छ । जसमा कालो पाइन्ट र सेतो कमिज रहेको छ ।
त्यस्तै गाउँपलिकाले १० पास गरेर ११ मा जाने युवतीका लागि साइकल खरिद गरिदिने निर्णय गरेको पनि उनले बताए ।