हामी सबैकाे संसारन्यूज

२५ फागुन, काठमाडौँ । सिके राउतसँगको सहमति अनुमोदनका लागि प्रधानमन्त्री केपी शर्मा ओलले बिहान ११ बजे सरकारी निवास बालुवाटारमा पार्टी सचिवालयको आकस्मिक बैठक डाकेका थिए । बैठकमा प्रधानमन्त्री ओलीले करिब डेढ महिनादेखिको लगातार वार्तापछि राउत पृथकतावादी आन्दोलन छाडेर शान्तिपूर्ण मूलधारको राजनीतिमा आउन सहमत भएको ‘बिफ्रिङ’ गरेका थिए । सहमतिको मस्यौदासमेत सुनाएपछि नेताहरु माधवकुमार नेपाल, झलनाथ खनाल, बामदेव गौतम र नारायणकाजी श्रेष्ठ पूर्ण आश्वस्त हुन सकेनन् । सहमति हुँदै गरेको ‘सरप्राइज’ विषयमा नेताहरुले सामूहिक रुपमै आशंकासहित सुझाव दिए–‘भाषा सच्याएर मात्रै सहमति गर्नुहोस्।’

‘हिंसा छाड्ने, पृथकतावादी सोच परित्याग गरेर स्वतन्त्र मधेसको माग छाडेर मूल धारको राजनीतिमा लाग्ने प्रतिबद्धतापछि सहमतिको वातावर(ा बनेको प्रधानमन्त्रीले बिफ्रिङ गर्नुभएको थियो,’ वरिष्ठ नेता खनालले भने, ‘हामीले पृथकतावादी सोच छाडेर संविधानसम्मत ढंगले मूल धारको राजनीतिमा प्रवेश गर्ने कुरा राम्रो हो, तर मस्यौदामा भाषा मिलाएर मात्रै सहमति गर्नुहोस्, भनेर उहाँको प्रस्तावलाई अनुमोदन गरेका हौँ ।’ नेताहरुले पृथकतावादी आन्दोलन परित्याग गरेको विषय मस्यौदामा स्पष्ट खुलाउनुपर्ने सुझाव दिएपछि प्रधानमन्त्री ओलीले त्यही प्रतिबद्धताअनुसार नै सहमति भएको बताएका थिए । ओलीको बाचापछि आशका कायमै रहेपनि बैठकले प्रस्ताव अनुमोदन गरेको थियो । समाचार आजको नयाँपत्रिका दैनिकले छापेको छ ।