हामी सबैकाे संसारन्यूज

२६ फागुन,रुकुम (पश्चिम) । पैसा कमाउन विदेशै जानुपर्छ । त्यो पनि अमेरिका युरोप अष्ट्रेलिया । आजभोली पैसा कमाउन खाडी जानुपर्छ भन्ने धेरैको सोच हटिसकेको छ । एकप्रकारले भन्ने हो भने ती देशहरुमा कामगर्न जानेहरु बाध्यताले मात्र पसेका छन् भन्दा फरक नहोला ।
तर, स्वदेशमै बसेर पनि धेरै गर्न सकिन्छ भन्ने उदाहरण रुकुमका डम्बर परियार बनेका छन् । डम्बर कुमारले मोटरसाइकल र कार धोएरै मासिक ९४ हजार आम्दानी गर्छन् भन्दा जो कोहीलाई पनि अचम्म लाग्न सक्छ । तर, यो कुरा सत्य हो ।

तपाइलाई लाग्ला काठमाडौं, बुटवल पोखरा या कुनै नाम चलेको सहरमा मोटर साइकल धोएर यतिधेरै पैसा कमाएको होला भन्ने लाग्न सक्छ । तर, त्यसो नभएर उनले आफ्नै जिल्ला, आफ्नै नगरपालिका अनि आफ्नै भूमिमा बसेर यस्तो पौरख देखाएका हुन् ।

रुकुम मुसिकोट नगरपालिका ५ सेरागाउँका ३४ वर्षीय डम्मर कुमार परियारले मोटरसाइकल धोएरै मासिक ९४ हजार रुपैयाँ आम्दानी गर्दै आएका हुन् ।

दुई वर्षदेखि पञ्चकन्या वासिङसेन्टर स्थापना गरेर सवारी धुने कामगर्दै आएका डम्मर कुमारले दैनिक १५ देखि २० वटा मोटरसाइकल र ३–४ वटा साना गाडी धुने गरेको बताउँछन् । उनले मोटर साइकलको १ सय र गाडी धोएको तीनसय रुपैयाँ लिने गरेका छन् ।

उनका अनुसार गाडी धोएको महिनामा घटिमा पनि ५५ हजार र बढीमा ९४ हजार रुपैयाँ सम्म आम्दानी हुने गरेको छ । परिवारका सबै सदस्य नै उक्त काममा लागेकोले बाहिर छुट्टै खर्च गर्नु नपर्ने उनको भनाई छ । उनको वासिङ सेन्टरमा उनी लगायत श्रीमती भाइसहित ४ जनाले कामगर्दै आएका छन् ।

आठ वर्ष कतारमा बसेर आएका उनले आफ्नै ठाउँमा केही गर्ने सोचले दुईवर्ष पहिलो वासिङ सेन्टर खोलेका हुन् । परिवार पाल्नकै लागि अर्काको देशमा जानुपर्ने अवस्था अन्त्यभएकोले आफू यसैमा सन्तुष्ट रहेको उनले बताएका छन् । आइतबारको गोरखापत्र दैनिकमा सुरेन्द्र खत्रीले रुकुमबाट लेखेका छन् ।