हामी सबैकाे संसारन्यूज

२२ कार्तिक, काठमाडौँ। पूर्व मुख्य सचिव तथा चीनका लागि नवनियुक्त राजदूत लिलामणि पौडेलले अष्ट ज अभियान नेपाल र यसले बढाएको आन्दोलनसँग आफू निरन्तर सँगै रहने प्रतिबद्धता जनाएका छन् ।

अष्ट ज अभियान नेपालको केन्द्रीय कार्यालय धोबिधारा काठमाडौमा आयोजित बधाई तथा शुभकामना कार्यक्रममा अष्ट ज अभियानका सल्लाहकार संयोजक समेत रहेका पौडेलले भने “मलाई अलिकति अप्ठ्यारो महशुस पनि भएको छ, यो अभियानका अभियन्ता मित्रहरुसँग केही समय भौतिक रुपमा सँगै हुन नपाए पनि उत्पादन, आत्मनिर्भर, स्वाधीनता र समृद्धिको साझा नेपाली सपना सम्प्रेषण गर्ने काममा जोडिरहने छु । बाग्मती सफाई अभियान, एनसेल कर भुक्तानी लगायत विकृतिका लडाईमा अग्रणी भूमिका खेलेका पौडेलले भने ‘बेथितिका विरुद्ध म चुप बस्न सक्दिन, राष्ट्रले आवश्यकताबोध गरेको बेलामा अलिकति फरक भूमिका मात्र लिएको हुँ, किसानका समस्या र पीडा अन्त्यका लागि म निरन्तर सक्रिय हुनेछु, चिन्ता नलिनु होला ।”
अष्ट ज अभियानका अध्यक्ष लोककृष्ण भट्टराईको सभापतित्वमा सम्पन्न सो कार्यक्रममा उपाध्यक्ष रुद्र शर्मा, महासचिव निलकण्ठ तिवारी, अभियन्ता प्रा.डा उद्धवराज खड्का लगायतले लिलामणिले पारेको प्रभाव र अपेक्षाका बारेमा आ–आफ्नो धारणा राखेका थिए ।