Sansar News
१४ चैत, काठमाडौं । गृह मन्त्रालयले लगानी सम्मेलन ( नेपाल इन्भेष्टमेन्ट समिट २०१९) को सुरक्षामा ६ हजार सुरक्षाकर्मी परिचालन गर्ने भएको छ । नेपाल प्रहरी, सशस्त्र प्रहरी बल (एपिएफ) र राष्ट्रिय अनुसन्धान विभागबाट ६ हजारभन्दा बढी जनशक्ति परिचालन गर्ने गृहमन्त्रालयले जनाएको छ ।
चैत १५ गते सुरु हुने सम्मेलनमा ३१ मुलुकका ६ सय ९ जना विशिष्ट अधिकारी तथा उद्योगपति आउने तय भएको छ । सम्मेलनको प्रधानमन्त्री केपी शर्मा ओलीले उद्घाटन गर्ने भएका छन् ।
प्रहरी प्रवक्ता एसपी उत्तमराज सुवेदीका अनुसार सम्मेलनमा नेपाल प्रहरीबाट ४ हजार २ सय जनशक्ति परिचालन गरिएको छ । प्रहरी प्रधान कार्यालयले महानगरीय प्रहरी प्रहरी कार्यालय रानीपोखरीमार्फत् जनशक्ति तैनाथ गरेको हो । सशस्त्र प्रहरी मुख्यालयले उपत्यका बाहिनीमार्फत् एसएसपीको कमान्डमा सम्मेलन सुरक्षार्थ जनशक्ति खटाएको छ ।
सशस्त्र प्रहरी प्रवक्ता डिआइजी सुरज श्रेष्ठले एसएसपी कालीदास धौवजीको नेतृत्वमा एक हजार ८ सय जनशक्ति सम्मेलन सुरक्षामा खटाइएको जानकारी दिए । राष्ट्रिय अनुसन्धान विभागले २ सयभन्दा बढी जनशक्ति तैनाथ गरेको छ । विहिबारको नागरिक दैनिकमा मातृका दाहालले लेखेका छन् ।
वि.सं.२०७५ चैत १४ बिहीवार ०७:०५ मा प्रकाशित
