हामी सबैकाे संसारन्यूज

१३ वैशाख, काठमाडौँ । सभामुखको सचिवालयले संघीय संसदका सभामुख कृष्णबहादुर महरामाथि केही सञ्चारमाध्यमहरुले लगाएको आरोपलाई प्रमाणीत गर्न चुनौती दिएको छ ।

सभामुखको सचिवालयका तर्फबाट प्रेस सल्लाहकार डिल्ली मल्लद्वारा जारी खण्डनमा ‘क्रिश्चियन धर्म प्रचारका पक्राउ परेका व्यक्तिहरुलाई छुटाउन प्रहरीलाई दबाब दिएको’ भनी केही अनलाइनहरुले सभामुख महराको नाम जोडेकोमा आरोप पुष्टि गर्न चुनौती दिइएको छ ।

उक्त घटना बारे समामुखलाई जानकारी नै नभएको र छुटाउन दबाब दिन कसैसँग सम्पर्क नभएको अवस्थामा सभामुखको चरित्र हत्या गर्ने उद्देश्यले समाचार बनाइएको भन्दै आपत्ति जनाइएको छ ।

उक्त खण्डनमा उक्त घटनाका बारेमा लगाइएको आरोप प्रमाणित गर्न म सम्बन्धित अनलाइनहरु र सञ्चालकलाई चुनौति दिन चाहन्छु, भनिएको छ । ‘समाचार गलत नियतबाट, कसैको चरित्र हत्या गर्ने उद्देश्य अथा बार्गेनिङ्ग गर्ने र भ्रम फैलाउने हिसाबले बनाइएको’ भनिएको छ ।

समाचारलाई भ्रामक, कपोल्कल्पित र छुद्र आरोप भएको भन्दै कोही पनि भ्रममा नपर्न अनुरोध गरिएको छ त्यस्ता सञ्चारमाध्यमहरुले पत्रकारिताको न्यूनतम मापदण्डभित्र नपर्ने भन्दै सुनियोजित ढंगले गरिएको हमलाको कानुनी उपचारको बाटो खोजिने समेत खण्डनमा उल्लेख गरिएको छ ।