हामी सबैकाे संसारन्यूज

स्रोतका अनुसार सर्वाधिक शक्तिशाली मानिएका युवा र विद्यार्थी संगठनमा पूर्व माओवादी र एमालेको सबैभन्दा बढी चासो रहेको छ । यसैले अखिल एमोलेको भागमा पर्दा युवा संघ माओवादीको भागमा पर्नेछ । दुवै संगठनको नाम पूर्व एमालेको अनेरास्ववियु र युवा संघ नै राखिने जनाइएको छ ।

२६ वैशाख, काठमाडौँ । पूर्ववर्ति दुई ठूला कम्युनिष्ट घटक नेकपा एमाले र नेकपा माओवादी केन्द्र एकता भएको वर्षदिन हुनै लाग्दा पनि जनवर्गीय तथा भातृ संगठनको एकता अझै अन्यौलमा रहेको छ । पार्टी उच्च स्रोतले पार्टी एकता दिवस तथा एमालेका तत्कालीन महासचिव मदन भण्डारीको स्मृति दिवस जेठ ३ गते सबै एकता सम्पन्न हुने बताएपनि स्पष्ट खाका सार्वजनिक गर्न भने सकेको छैन ।

जनवर्गीय संगठनमा कसको नेतृत्व स्थापित हुने भन्ने जुंगाको लडाईका कारण एकता सम्पन्न हुन नसकेको हो । खासगरी विद्यार्थी, युवा, महिला, मजदुरमा पूर्व एमाले र माओवादीको आ–आफ्नै दाबीका कारण प्रष्ट एकताको खाका सार्वजनिक हुन सकेको छैन ।

नेकपा उच्च स्रोतका अनुसार जनवर्गीय संगठनहरुको एकताको अन्तिम प्रयास भने भइरहेको छ । महासचिव विष्णु पौडेल नेता जनार्दन शर्मा, योगेश भट्टराई र खिमलाल भट्टराईको समूहले एकता टुङ्ग्याउने गरी पहल गरिरहेको छ । जनवर्गीय संगठनको एकतालाई गति दिन प्रधानमन्त्रीका राजनीतिक सल्लाहकार विष्णु रिमाल, प्रदेश ३ का आन्तरिक मामिला मन्त्री सालिकराम जमरकट्टेलले पनि आन्तरिक पहल गरिरहेको स्रोतले बताएको छ ।

स्रोतका अनुसार संगठन व्यवस्थापन गर्न संयोजक र सहसंयोजको व्यवस्था गर्न लागिएको पनि बताइएको छ । पूर्व एमाले सम्बद्ध नेतृत्वले संयोजक पाएका जनवर्गीय संगठनमा पूर्व माओवादी सम्बद्ध नेता सहसंयोजक रहने छन् । यस्तै पूर्व माओवादीले संयोजक पाउँदा सहसंयोजक एमालेको भागमा पर्नेछ ।

उच्च स्रोतका अनुसार सर्वाधिक शक्तिशाली मानिएका युवा र विद्यार्थी संगठनमा पूर्व माओवादी र एमालेको सबैभन्दा बढी चासो रहेको छ । यसैले अखिल एमोलेको भागमा पर्दा युवा संघ माओवादीको भागमा पर्नेछ । दुवै संगठनको नाम पूर्व एमालेको अनेरास्ववियु र युवा संघ नै राखिने जनाइएको छ ।

मजदुर र महिला संघको नाममा अझै समझदारी नभएपनि मजनुर एमालेको भागमा र महिला संघ माओवादीको भागमा पर्ने छ । यस्तै प्राध्यापक संघ र बुद्धिजीवीमा पनि एमालेको नेतृत्व स्थापित हुने स्रोतको दाबी छ ।