हामी सबैकाे संसारन्यूज

८ जेठ, दाङ । जिल्ला अदालत दाङले कैद भुक्तान गर्न र जरिवाना तिर्न बाँकी रहेका एक हजार ७९० अपराधीको नाम ठेगानासहित स्थानीय तहमा विवरण पठाएको छ ।

सेवा प्रवाहमा उनीहरुको पहिचान गर्न आग्रह गर्दै कुनै पनि सार्वजनिक सेवा नदिन अदालतले सम्बन्धित उपमहानगरपालिका, नगरपालिका, गाउँपालिका र वडामा पत्र पठाएको हो ।

अदालतका मुख्य न्यायाधीश हेमन्त रावलका अनुसार दाङमा विसं २००८ देखि २०७५ सालसम्म कैद सजाय तोकिएका २७९ नेपाली र नौ विदेशीसहित २८८ अपराधी अदालतको फरार सूचीमा छन् । त्यसैगरी, जरिवाना तोकिएका एक हजार ८५ नेपाली र पाँच जना विदेशी गरी एक हजार ९० जना अपराधी फरार छन भने कैद तथा जरिवाना दुवै फैसला भएका ४०८ नेपाली र चार विदेशी गरी ४१२ अपराधी फरार सूचीमा छन् ।

अपराधीको विवरण वडागतरुपमा स्थानीय सरकारलाई उपलब्ध गराइएको र उनीहरुलाई सेवा दिए कर्मचारी तथा जनप्रतिनिधिलाई कारवाही हुनेसमेत न्यायाधीश रावलले बताए । त्यसैगरी प्रशासन, बैंक तथा वित्तीय संस्थालाई पनि पत्र पठाउने तयारी भइरहेको उहाँले जानकारी दिए ।

मुलुकी फौजदारी कार्यविधि संहिता, २०७४ को दफा ६५ तथा जिल्ला अदालत नियमावली २०७५ को नियम ८७ को व्यवस्थाअनुसार सबैलाई पत्राचार गरिएको उनको भनाइ छ ।