हामी सबैकाे संसारन्यूज

२७ असार, रोल्पा । सुनछहरी गाउँपालिका –२ भित्री गामको चालवाङ बस्ती दुई साताअघिदेखि सुनसान छ । बस्तीमा घर छन् । तर,मानिस छैनन् । ‘बर्र्खा लागेपछि गाउँ छोडेर जङ्गल नजिक गोठमा सरेका छौ,’ चालवाङका ४९ बर्षीय थमन बुढामगर भन्छन्,‘गाउँमा सबैको घरमा तालाचाबी लागेका छ ।’
२२ घरधुरी रहेको यो गाउँ ६ महिना रित्तो हुन्छ । बस्तीमुनि चालवाङ खोला सुसाइरहेको छ । गाउँलेका अनुसार ठाडो खोलामा आउने भेलले बर्सेनि बस्तीको तल्लो भूभागमा कटान गर्दै आएको छ । २०४५ सालयता बस्तीकाकै पुछारमा पहिरो जान थालेको सुनछरी गाउँपालीका –२ का वडाध्यक्ष टेमन घर्तीमगर बताउँछन् । पहिरोपीडित थमन बुढाका अनुसार पटकपटक वर्षातमा परी चालवाङका १० वटा घर पुरिएका छन् । बर्खामा बस्ती छाड्नाले मानवीय क्षति भएको छैन । गाउँमा पहिरो जान थाल्दा देशमा पञ्चायती व्यवस्था थियो ।बहुदल आयो । गणतन्त्रसमेत आयो । तर चालवाङवासीको दुःख हटेको छैन । शुक्रबारको अन्न्पूर्ण पोस्ट दैनिकबाट