हामी सबैकाे संसारन्यूज

२३ साउन, काठमाडौं । उदयपुर, मोरङ र झापाका विभिन्न स्थानबाट लागुऔषधसहित पक्राउ परेका छन् ।

उदयपुर, त्रियुगा नगरपालिका – ६ चुरेबाट अवैध लागूऔषध गाँजा करिब २ सय ग्राम सहित त्रियुगा नगरपालिका ६ जलजले बस्ने मनोज चौधरी र सन्तोष चौधरीलाई बुधबार साँझ प्रहरीले पक्राउ गरेको छ ।

जिल्ला प्रहरी कार्यालय उदयपुर र ईलाका प्रहरी कार्यालय जलजलेबाट संयुक्त रुपमा खटिएको प्रहरीले लहानबाटगाईघाटतर्फ जाँदै गरेको स.९ प ८२५१ नम्बरको मोटरसाइकल जाँच गर्ने क्रममा मोटरसाइकलमा सवार उनीहरुलाई उक्त लागूऔषध सहित फेला पारी पक्राउ गरेको हो ।

त्यस्तै मोरङ, सुनवर्षी नगरपालिका– ८ सिक्टीस्थितबाट मिक्लाजुङ गाउँपालिका- ९ बस्ने गोविन्द प्रसाद भण्डारी र रतुवामाई नगरपालिका- ५ घोपाबाधटोल बस्ने दिपक पौडेललाई नियन्त्रित लागूऔषध १ सय एमएलको कोरेक्स डिसी ५ बोतल र पौरुष जीवन ८४ क्याप्सुल भएको ८ प्याकेट सहित बुधबार साँझ प्रहरीले पक्राउ गरेको छ ।

प्रहरी चौकी सिक्टीबाट खटिएको प्रहरीले को ५ प १५९८ नम्बरको मोटरसाइकल जाँच गर्ने क्रममा मोटरसाइकलमा सवार उनीहरुलाई उक्त लागूऔषध सहित फेला पारी पक्राउ गरेको हो ।

यसैबीच झापा, जिल्ला प्रहरी कार्यालय झापा र ईलाका प्रहरी कार्यालय अनारमनीबाट खटिएको प्रहरीले बिभिन्न स्थानबाट अवैध लागूऔषध ब्राउन सुगर जस्तो देखिने पदार्थ ८ सय ५० मिली ग्राम सहित ३ जनालाई बुधबार दिउँसो प्रहरीले पक्राउ गरेको छ ।

पक्राउ पर्नेहरुमा संखुवासभा खादबारीनगरपालिका ३ बस्ने बिक्रम राई, झापा बिर्तामोड नगरपालिका – २ बस्ने तुम्बा भन्ने निर्मल चौधरी र झापा बिर्तामोड नगरपालिका -४ बस्ने कल्याण क्षेत्री रहेका छन् ।

राईको साथबाट १ सय २५ मिली ग्राम, चौधरीको साथबाट ६ सय मिली ग्राम र क्षेत्रीको साथबाट १ सय २५ मिलि ग्रामउक्त पदार्थ प्रहरीले बरामद गरेको हो ।

यस सम्बन्धमा स्थानीय प्रहरीले थप अनुसन्धान गरिरहेको प्रहरीले बताइएको छ ।