हामी सबैकाे संसारन्यूज

३ कार्तिक, कञ्चनपुर । सीमामा हुने प्राकृतिक स्रोत नेपाल भारतको सीमामा बग्ने महाकाली नदी (Mahakali River) दुवै देशको साझा नदी भनिए पनि शारदा ब्यारेजका १६ वटै ढोकामा ताल्चा लगाएर भारतले महाकालीको पूरै पानी भारततर्फ लैजाँदा श्मशानघाटमा लाश जलाएर खरानी बगाउनसमेत नेपालीले पाउन सकेका छैनन् । नेपाल भारतको सीमामा बग्ने महाकालीको पानी आधा आधार गरिने भने पनि भारतले बर्खामा सबै ढोका खोलिदिँदा बाढी र हिउँद लागेपछि ब्यारेजका सबै ढोका थुनेर पानी लैजाँदा कञ्चनपुरमा खडेरी हुने गरेको छ । सञ्चारक्षेत्रमा काम गर्दै आइरहेको थर्डपोलले कञ्चनपुरमा आयोजना गरेको नेपाल भारतका पत्रकारको संयुक्त कार्यक्रममा भीमदक्त नगरपालिकाका उपमेयर सुशीला चन्द सिंहले महाकाली साझा नदी भनिए पनि शारदा ब्यारेजको चाबी भारतको हातमा हुँदा नेपालले पानी नपाएको बताइन् ।

उपमेयर चन्दले भनिन् –भारतले शारदा ब्यारेजका १६ वटै ढोखा बर्खामा खोल्ने गरेको र हिउँदामा सबै ढोका थुनेर जम्मै पानी लैजाँदा नेपालतर्फ सिंचाइ हुँदैन । घाटमा लाश जलाएर खरानी पखाल्नसमेत पानी हुँदैन । कम्तिमा एउटा ढोका खोलिदिए पनि नेपालीलाई राहत हुन्थ्यो । के गर्ने ? ब्यारेजको चाबी भारतको हातमा छ । बर्खामा १६ वटै ढोका खोल्ने र हिउँदमा सबै ढोका बन्द हुने गरेका छन् ।

सन् १९६६ मा नेपाल भारतबीच एकीकृत महाकाली सन्धि हुँदा दोधारा र चाँदीलाई सिंचाइका लागि पानी दिनुपर्ने तथा भारतीय भूमिका एक हजार दुई सय नहर निर्माण गर्नुपर्ने कुरा उल्लेख गरिएको थियो । वि.सं २०५२ माघ २९ गते तत्कालीन प्रधानमन्त्री शेरबहादुर देउवा र भारतीय प्रधानमन्त्री पीभी नरसिंह रावबीच महाकाली सन्धिमा हस्ताक्षर भएको थियो ।

समाचार स्रोत : गोरखापत्र दैनिक