Sansar News
१९ कार्तिक , काठमाडौँ । भ्रष्टाचार तथा सम्पत्ति शुद्धीकरणसम्बन्धी विषयको छानबिनमा परेका नेपाल राष्ट्र बैंकका डेपुटी गभर्नर शिवराज श्रेष्ठ निलम्बनमा परेका छन् ।
सोमबार बिहान राष्ट्रबैंकको सञ्चालक समितिले उनीमाथि छानबिन गर्न ३ सदस्यीय समिति गठन गरेसँगै उनी निलम्बनमा परेका हुन् । श्रेष्ठमाथि छानबिन गरी कारबाहीको सिफारिस गर्न मन्त्रिपरिषद्ले अर्थमन्त्रालयमार्फत राष्ट्रबैंकलाई निर्देशन दिएको थियो ।
सोमबार बिहान ७ बजे बसेको राष्ट्र बैंकको सञ्चालक समितिको बैठकले श्रेष्टमाथि छानबिन गर्न सञ्चालक प्रा. डा. श्रीराम पौडेलको संयोजकत्वमा तीन सदस्यीय छानबिन समिति गठन गरेको थियो । समितिलको सदस्यहरुमा सञ्चालकहरु रामजी रेग्मी र डा. सुबोधकुमार कर्ण छन् ।
सोमबार दिउँसो नै समितिको पहिलो बैठक बसेको थियो । बैठकले डेपुटी गभर्नर श्रेष्ठमाथि अनुसन्धान गर्नुपर्ने विषयबारे स्पष्ट जानकारी गराउन सम्पत्ति शुद्धीकरण अनुसन्धान विभागलाई पत्राचार गर्ने निर्णय छ । मंगलबारको नयाँ पत्रिका दैनिकबाट
वि.सं.२०७६ कात्तिक १९ मंगलवार ०७:४१ मा प्रकाशित
