हामी सबैकाे संसारन्यूज

१९ मंसिर युके । बेलायतमा रहेकी स्नेहा शाक्य श्रेष्ठ दोश्रो पुस्ताकी पहिलो नेपाली ब्यारेष्टर बन्न सफल भएकी छन् । श्रेष्ठ ब्यारेष्टर बन्नका लागि हालैमात्र बेलायतको इनर टेम्पल बारको सदस्य भएको बताइएको छ ।

बेलायतको सिटी कलेजबाट यहि वर्ष बार प्रोफेसनल ट्रेनिङ्ग कोर्स ( बिपीटिसी) मा उच्च (८० प्रतिशत बढी) अंक प्राप्त गरेर ब्यारेष्टर बन्न अन्तिम तयारी पुपिलेज गर्न योग्य भएको बताइएको छ । शाक्यले केही समयपछि अन्य कानुनी फर्ममा कामको अनुभव प्राप्त गरेपछि प्राक्टिसिङ्ग ब्यारेष्टर बन्नेछिन् ।

यसभन्दा अगाडि प्रोफेसर डाक्टर सुर्य सुवेदी, क्युसी तथा देबेन्द्र श्रेष्ठ बेलायातमा ब्यारेष्टरको रुपमा कार्यरत छन् भने शाक्य दोश्रो पुस्ताकी पहिलो नेपाली ब्यारेष्टर बन्न सफल भएकी हुन् ।

दुई दशक देखि बाबुआमासँग बेलायतमा रहँदै आएकी स्नेहा सिन्धुपाल्चोक चौतारा घर भएका अधिवक्ता सुरेन्द्र नेपाल श्रेष्ठ र मिनु शाक्यकी छोरी हुन् । दुई कक्षा सम्म्को शिक्षा नेपालमै हासिल गरेपश्चात उनी बाबुआमासँगै बेलायत पुगेकी हुन् ।

विद्यालय शिक्षा वर्दिग र स्लाओ ग्रामर तथा उच्च शिक्षा युनिभर्सिटी अफ एसेक्सबाट एलएलबि, किंग्स कलेजबाट एलएलएम उतिर्ण गरेकी स्नेहा लण्डनस्थित प्रसिद्ध किंग्स कलेजको एलएलएमको शोधका निम्ति नेपालमा युद्धबन्दीलाई यातना दिएको आरोपमा निकै चर्चा पाएका कर्णेल कुमार लामाको विषयमा अनुसन्धान गर्न लामो समय नेपालका विभिन्न स्थानमा गएर सरोकारवाला र विज्ञहरुसँग कुराकानी गरेकी थिइन् ।