हामी सबैकाे संसारन्यूज

मलेसिया सरकारले कागजातविहिन वा अवैधानिक भै मलेसिया बसेका नेपालीहरुलाई नेपाल फर्काउन सहज बनाउन मलेसिया स्थित नेपाली दूतावास सक्रियतापूर्वक लागिपरेको छ ।

आममाफीको फाइदा लिँदै नेपाल फर्कन चाहने त्यस्ता नेपालीहरुको कामलाई सहज बनाउन बिहान देखि बेलुकासम्म जुट्नुका साथै सार्वजनिक बिदाका दिनसमेत केही घण्टाका लागि दूतावास खुला राखिने जानकारी सहित नयाँ समयतालिका प्रकाशित गरेको छ । मंसिर ३० देखि पुष १५ गतेसम्मका लागि दूतावासले नयाँ समयतालिका ल्याएको हो ।

दूतावासले जारी गरेको सूचना अनुसार सोमबारदेखि शुक्रबार सम्म बिहान ८ बजेदेखि ५ बजेसम्म दूतावासका अन्य काम हुनेछन् भने शनिबार र आइतबार बिहान १० बजे देखि दिउँसो २ बजेसम्म यात्रा अनुमती पत्र तथा घरर्फीति कार्यक्रमसम्बन्धी सेवा प्रवाह गरिने जानकारी गराइएको छ ।

मागपत्र प्रमाणीकरणको लागि काजगात बुझाउने समय भने साविक ९.३० बजेदेखि दिउँसोको १२ बजेसम्म मात्र हुने बताइएको छ ।

मलेसिया सरकारले मलेसियामा बसेका विदेशी नागरिहरुलाई आफ्नो मुलुक फिर्ता हुन १ अगष्ट २०१९ देखि ३१ डिसेम्वर २०१९ सम्म ५ महिनाका लागि आममाफी कार्यक्रम ल्याएको छ । उक्त अवधिमा नफर्किए उनीहरुविरुद्ध कडा कारवाही गरिने जनाइएको छ ।