हामी सबैकाे संसारन्यूज

७ पुस, काठमाडौँ । महिला, बालबालिका तथा ज्येष्ठ नागरिकमन्त्री पार्वत गुरुङले ज्येष्ठ नागरिकसम्बन्धी १० वर्षे रणनीतिक योजना बनाउने घोषणा गरेका छन् ।

सिंहदरबारस्थित आफ्नै कार्यकक्षमा ज्येष्ठ नागरिकसँगको अन्तरक्रियामा मन्त्री गुरुङले भने, “ज्येष्ठ नागरिकको ज्ञान, सीप र अनुभव राष्ट्रको हितमा प्रयोग हुनेगरी सरकारले ज्येष्ठ नागरिकसम्बन्धी १० वर्षे रणनीतिक योजना तयार गरेर कार्यान्वयनमा ल्याउने छ ।”

उनले ज्येष्ठ नागरिकको हित हुनेगरी सरकारले आगामी आवको नीति, कार्यक्रम र बजेट ल्याउने तयारी गरिरहेको उल्लेख गर्दै त्यसका लागि आवश्यक सुझाव दिन पनि सम्बन्धित सबै पक्षसँग आह्वानसमेत गरे । मन्त्री गुरुङले ज्येष्ठ नागरिकका ज्ञान, सीप र अनुभवलाई मुलुकको समृद्धिसँग जोडेर अघि बढ्ने गरी सरकारले १० वर्षे रणनीतिक योजना बनाउने तयारी गरेको अवस्थामा आवश्यक सुझाव दिन ज्येष्ठ नागरिकको क्षेत्रमा कार्यरत सङ्घ, संस्था तथा विज्ञहरुलाई आग्रह गरे ।

राष्ट्रिय सूचना आयोगका प्रमुख सूचना आयुक्त कृष्णहरि बाँस्कोटाले राष्ट्रका लागि उत्कृष्ट योगदान पु¥याउने कम्तिमा १० जना ज्येष्ठ नागरिकलाई हरेक वर्ष १० लाख नगदसहित सम्मान गर्नुपर्नेमा जोड दिए । राष्ट्रिय ज्येष्ठ नागरिक महासङ्घका अध्यक्ष मदनदास श्रेष्ठले सरकारले ज्येष्ठ नागरिकका समस्या समाधान गर्नुपर्नेमा जोड दिए ।