हामी सबैकाे संसारन्यूज

रुसमा १९१७ को अक्टोबर समाजवादी क्रान्ति पछि विश्वमा समाजवादका लागि संगठन निर्माणको अभियान नै चल्यो । यही क्रममा चीनको संघाईमा १९१८ मा माक्र्सवादी अध्ययन समाज, बेइजिङमा कम्युनिस्ट सोसलिस्ट युथ लिग, मई १९२० मा संघाई र बेइजिङमा कम्युनिस्ट ग्रुप, यसै वर्षको डिसेम्बरमा क्यानटोन, हुनान, हुपेह र सानतुङमा कम्युनिस्ट ग्रुपहरू स्थापना भएका थिए । यही बेला चिनियाँ विद्यार्थीहरू अध्ययन गर्ने टोकियो र पेरिसमा पनि कम्युनिस्ट समुहहरू स्थापना भए । यी सबैको पृष्ठभूमिमा जुलाई १, १९२१ मा संघाईमा चिनियाँ कम्युनिस्ट पार्टीको स्थापना भयो । यो नै पार्टीको पहिलो महाधिवेशन र औपचारिक पार्टीको स्थापना दिवस मानियो । यो महाधिवेशनमा चीन भरिका ५७ पार्टी सदस्यहरूबाट छानिएर १२ प्रतिनिधि संघाई पुगेका थिए जसमा माओ त्से–तुङ पनि एक थिए । पार्टी स्थापनाको २८ वर्षपछि चीनमा माओको नेतुत्वमा क्रान्ति सफल भयो र अक्टोबर १, १९४९ मा चीन जनवादी गणतन्त्र घोषणा भयो ।

कम्युनिस्ट चीनमा समस्याका चाङ देखा परे । पार्टीले १९५१–५२ मा दुईवटा कार्यक्रम पहिलो सान फान आन्दोलन (मुभमेन्ट) र दोस्रो वु फान अभियान (क्याम्पेन) चलायो । सान फान ३ खराबीः भ्रष्टाचार, सरकारी साधनको दुरुपयोग र नोकरशाहीतन्त्रको विरुद्ध आन्दोलन थियो । वु फान ५ खराबीः कर्मचारीको घुसखोरी, कर छलि, राष्ट्रिय सम्पत्तिमा लूट, सरकारी ठेक्कापट्टामा कमिसनखोरी र आर्थिक सूचनाको चोरी विरुद्ध अभियान थियो । यतिले पनि सुधार नआएकाले माओको नेतृत्वमा चीनमा १९६६ देखि सर्वहारा सांस्कृतिक क्रान्ति सुरु गरियो । चीन आज जहाँ पुगेको छ त्यसमा माओको नै सबैभन्दा ठूलो योगदान छ । डिसेम्बर २६, १८९३ मा चीनको हुनानमा जन्मिएका माओको सेप्टेम्बर ९, १९७६ मा बेइजिङमा ८२ वर्षको उमेरमा देहावसान भयो । आज पनि चीन समस्या विहीन चाहिँ छैन । चीनमा अहिले जनतन्त्रको सवाल, जातीय समस्या, हङकङको आन्दोलन र सबैभन्दा गम्भीर चिनियाँ जनतामा बढ्दो आर्थिक असमानता रहेका छन् । हालसम्म चिनियाँ कम्युनिस्ट पार्टीका १९ महाधिवेशन भएका छन् र यसका ९ करोड ५४ लाख सदस्यहरू छन्, यही पार्टीका संस्थापक महान नेता माओको आज जन्मजयन्ती चीनले मात्र होइन विश्वका मेहनतकश जनताहरूले पनि मनाइरहेका छन् र भनिरहेका छन माओ महान छन् ।