हामी सबैकाे संसारन्यूज

काठमाडौँ । काजल फिल्मस्को ब्यानरमा निर्माण हुन लागेको नयाँ चलचित्र ‘एन्टी हिरो’ मा अभिनेत्री जसिता गुरुङसँग अभिनेता अनमोल केसीले रोमान्स गर्ने फाइनल भएको छ । र, उक्त चलचित्रमा भुवन केसी भिलेन बन्ने भएका छन् ।

चलचित्र ‘लिलिबिली’ बाट आफ्नो फिल्म करिअर सुरु गरेकी नायिका जसिताको पछिल्लो समय प्रदर्शन भएको चलचित्र ‘लभ स्टेशन’ हो । यो चलचित्र बक्सअफिसमा असफल भएपछि उनले रेनशा वान्तवा राईको ‘आई एम ट्वान्टिवान’ साइन गरेकी हुन् । उक्त चलचित्र अहिले सम्म छायांकन हुन नसकेको बताइएको छ ।

नायक तथा निर्माता भुवन केसीले निर्माण गर्न लागेको उक्त चलचित्र ‘एन्टी हिरो’ मा जसिता र भुवनबीच बुधबार कागजी रुपमा सम्झौता भएको छ । त्यस्तै, उक्त फिल्ममा नायक भुवन केसीको पनि अभिनय रहेको र उनी नकारात्मक भूमिकामा देखिने बताइएको छ ।

फिल्मका लागि लिड अभिनेता र अभिनेत्रीको टुंगो लागे पनि निर्देशक भने फाइनल भएका छैनन् । प्राप्त जानकारी अनुसार, फिल्मलाई एक भारतीय निर्देशकले निर्देशन गर्नेछन् । केहि दिनमा निर्देशकसँग पनि कागजी सम्झौता गर्ने भन्दै ‘एन्टी हिरो’ को छायांकन बैशाख १ गतेबाट सुरु हुने निर्माता भुवन केसीले बताएका छन् ।