हामी सबैकाे संसारन्यूज

२६ मंसिर, काटमाण्डौं । संविधान संशोधन, निर्वाचन कानुनसहित संविधान कार्यान्वयनका विषयमा प्याकेजमै सहमति गरेर गतिरोध अन्त्य गर्न सरकार तयार देखिएको छ । सरकारले सब राजनीतिक दलबीचको सहमति र सहभागितामा निर्वाचन गराउने उद्देश्यले संसद्मा संविधान संशोधन विधेयक दर्ता गराएको जनाउँदै निर्वाचन कानुनलाई पनि सँगसँगै अगाडि बढाउन तयार रहेको बताएको छ ।

सरकारले संयुक्त मधेसी मोर्चालगायत असन्तुष्ट पक्षको माग सम्बोधनका लागि संविधान संशोधन विधेयक दर्ता गरेपछि विपक्षी दलहरूले सडक र सदनमा आन्दोलन गर्दै आएका छन् । आन्दोलनको ११औं दिन बितेपछि सरकारले गतिरोध समाधानका लागि सहमतिमै जोड दिँदै प्याकेज अवधारणा अघि सारेको हो । सरकारले प्रतिपक्षी एमालेले वर्तमान समस्याको निकासका लागि निर्वाचन कानुनलाई सँगै लिएर जान औपचारिक प्रस्ताव गरे सरकार तयार रहेको भन्दै सहयोगी भूमिका खेल्न एमालेलाई आग्रहसमेत गरेको हो ।

कानुनमन्त्री अजय शंकर नायकले निर्वाचनका लागि नै संशोधन दर्ता गराएको बताउँदै एमालेबाट निर्वाचन कानुन पनि एकैसाथ अगाडि बढाउने प्रस्ताव आए सरकार तयार रहेको बताए । ‘सरकारले नर्वाचनको वातावरण बनाउनकै लागि संशोधन दर्ता गरेको हो, राष्ट्रिय निकासका लागि मुख्य तीन दलको सहमति नजुटी नहुने स्थिति छ,’ मन्त्री नायकले भने, ‘त्यसैले हामी निकासका लागि प्याकेजमै सहमति गरेर अघि बढ्ने गरी छलफलमा छौं ।’ आजको राजधानी दैनिकले लेखेको छ ।