हामी सबैकाे संसारन्यूज

१९ माघ, काठमाडौं । राष्ट्रियसभा बैठकमा सांसदहरुले सीमा सुरक्षा, आधारभूत स्वास्थ्य उपचार सेवा पाउने संवैधानिक हकको कार्यान्वयन हुनुपर्ने र कोरना भाइरस जस्ताबाट बच्न सरकारले सचेतना अपनाउनुपर्नेमा जोड दिएका छन्।

बैठकको शून्य समयमा नेपाली कांग्रेस रमेशजङ्ग रायमाझीले कोरना भाइसर रोक्न सरकारले चासो दिनुपर्ने बताए। नेकपाकी डा विमला राई पौडेलले ग्यासको हिटरले भारतीय पर्यटनको मृत्युजस्ता समस्यालाई गम्भीरतापूर्वक लिई जनताको जीउधनको सुरक्षामा ध्यान दिन माग गरिन्।

कांग्रेसकै राधेश्याम अधिकारीले आधारभूत स्वास्थ्य सेवा पाउने अधिकार संविधानको मौलक हकमा व्यवस्था भए पनि जनताले निःशुल्क भनिएका औषधि सहजै पाउन नसकेको गुनासो गरे। उनले भने, ‘स्वास्थ्य र शिक्षा सहज हुनुपर्नेमा निजी र सरकारी विद्यालयका नाममा विभेद छ।’

नेकपाका युटोल तामाङले मन्त्रिपरिषद्‌मा महिलाको सङ्ख्या घटाइएकामा चिन्ता प्रकट गरे। राजपाका वृषेशचन्द्र लालले सीमा र राष्ट्रिय सुरक्षाबारे सरकार गम्भीर हुनुपर्ने बताए। नेकपाकी मीना बुढाले ग्रामीण भेगका सामुदायिक विद्यालयमा अंग्रेजी विषय शिक्षक अभाव भएकामा चिन्ता प्रकट गरिन् । समाजवादी फोरमकी प्रमिला कुमारीले नागरिकता विधेयक छिटो ल्याउन माग गरिन् । नेकपाका शेरबहादुर कुँवरले सुदुरपश्चिमा रहेको छाउपडी प्रथा अन्त्य गराउन आग्रह गरे।