Sansar News
२० माघ, काठमाडौं । एमसीसीसम्बन्धी अध्ययन कार्यदलको पहिलो बैठक सम्पन्न भएको छ । नेकपाले आइतबार मात्र पूर्वप्रधानमन्त्री झलनाथ खनालको संयोजकत्व भीम रावल र प्रदीप ज्ञवाली सदस्य रहनेगरी एमसीसी अध्ययन कार्यदल गठन गरेको थियो ।
कार्यदलको घोषणा भएको भोलिपल्टै सोमबार पहिलो बैठक बसेको हो। बैठकमा संयोजक खनालसहित दुई सदस्य उपस्थित थिए । बैठकमा एमसीसी सम्झौतासम्बन्धी के-कस्ता सन्दर्भ सामाग्रीहरु अध्ययन गर्ने भन्नेबारेमा छलफल भएको स्रोतको दाबी छ । बिना पूर्वाग्रह विषयबस्तुको गहन अध्ययनपछि मात्र साझा सुझाव बनाउने भन्नेमा तीनै नेता सहमत भएका छन् ।
खनाल नेतृत्वको समितिलाई १० दिनभित्र अमेरिकी सहयोग मिलेनियम च्यालेञ्ज कर्पोरेशन (एमसीसी)सम्बन्धी पार्टीलाई प्रतिवेदन बुझाउन भनिएको छ ।
एमसीसीको आलोचना गर्दै आएका खनाल रावल सहभागी कार्यदलले कस्तो सुझाव देला भन्ने जिज्ञासा यतिबेला सर्वत्र रहेको पाइन्छ ।
वि.सं.२०७६ माघ २० सोमवार १५:१४ मा प्रकाशित
