हामी सबैकाे संसारन्यूज

२८ माघ । नेपाली जनसम्पर्क समिति अमेरिकाको निर्वाचन नजिकँदै छ । तर समिति भने विवादका कारण आफैमा बिरामीमा छ । विवादका कारण लामो समयदेखि अधिवेशन हुन सकेको छैन । बल्लतल्ल समितिले आगामी अप्रिल २०२० मा अधिवेशन गर्ने निर्णय गरेको छ । निर्वाचनको मिति तय भएसँगै निर्वाचनका आकांक्षीहरुको चर्चा पनि सुरु भएको छ ।

सन् २०१४ को नोभेम्बर २२ र २३ तारेख अमेरिकाको टेक्सास राज्य स्थित डालस शहरमा सम्पन्न ‘एकताको दोश्रो अधिवेशन’ बाट निर्वाचित समितिलाई नै नेपाली कॉंग्रेस पार्टीले अधिवेशन तयारी समितिमा रुपान्तरण गरी छ महिना भित्र अधिवेशन सम्पन्न गर्नु गराउनु भन्ने निर्देशनात्मक परिपत्र गरेको थियो । तर विवादका कारण यतिका बर्ष बित्तिसक्दा पनि अधिवेशन सम्पन्न हुन सकेको छैन ।

अधिवेशन गर्नुपर्ने आवाज उठाउँदै आएको भएपनि बल्ल अधिवेशन गर्ने निर्णयसम्म गर्न सकिएको वरिष्ठ उपाध्यक्ष धनञ्जय नरसिंह के.सीले बताए । उनका अनुसार अब सबै मिलेर अधिवेशन सम्पन्न गर्नुको विकल्प छैन । समितिमा सदस्यता र अधिवेशन समय सिमाका कुरालाई विवादहरु आइरहेका छन् । नेपाली काँग्रेसको विधान अनुसार अमेरिकी नागरिकता भएकालाई सदस्यता दिन नमिल्ने व्यवस्था छ ।

आउँदो अधिवेशनमा सभापतिमा उम्मेदवारी दिने सोच बनाएका वरिष्ठ उपाध्यक्ष के.सी. ले झिना मसिना कुरा छाडेर सबै मिलेर जनसम्पर्क समिति अमेरिकाको अधिवेशन सम्पन्न गर्नुपर्नेमा जोड दिएका छन् । अधिवेसन सम्पन्न हुन सक्यो भने जनसम्पर्क समितिमा देखिएको विवाद समाप्त हुने र समितिले क्रियाशिल भएर काम गर्न सक्ने उनले बताए ।