हामी सबैकाे संसारन्यूज

१५ फागुन, अमेरिका । युनाइटेड किरात राई अर्गनाइजेसन अफ अमेरीकाले हालको १ नं प्रदेशको नाम “किरात प्रदेश’ राखिनु पर्ने माग गरेको छ ।
हालै अर्गनाइजेशनकी केन्द्रीय सभापती श्रीमती मुना राईको नेतृत्वमा गएको प्रतिनिधि मण्डलले नेपाली महावाणिज्य दूतावास न्यूयोर्कमार्फत् १ न प्रदेशको सभामुख र प्रदेश सांसदहरुलाई ज्ञापनपत्र हस्तान्तरण गरेको हो ।

न्युयोर्कस्थित महावाणिज्यदूत पुष्प राज भट्टराईलाई ज्ञापनपत्र प्रस्तुत गर्नु हुदै सभापति श्रीमती मुना राईले शिघ्राती शिघ्र ज्ञापनपत्र सरकारी संयत्रमार्फत् १ नं प्रदेश सभामा पुर्याई दिनु अनुरोध समेत गरेकी थिइन् ।

सोहि अवसरमा ज्ञापनपत्र बुझ्दै महावाणिज्यदूत पुष्पराज भट्टराईले नेपाल सरकारको सम्बन्धित निकायमा पठाउने प्रतिवद्दता व्यक्त गरेका थिए ।

अर्गनाइजेसनका मिडिया कोअर्डिनेटर सुरेश चाम्लिङ्गले वाचन गरेको उक्त ज्ञापनपत्र बोधार्थ तथा कार्यार्थ प्रधानमंत्री केपी ओली र १ नं प्रदेशका मुख्यमन्त्री शेरधन राईलाई दिइएको छ ।

उक्त प्रतिनिधी मण्डलमा अर्गनाइजेसनका संस्थापक सभापति शिब कुमार राई, पूर्वकेन्द्रीय सभापति मिलन राई, न्युयोर्क लोकल च्याप्टर सभापति केशब राम राई, कोषाध्यक्ष गणेश राई,बि ओ डि सुख राज राई ,लोकल च्याप्टर सदस्यहरु–बिबेक राई, तारा राई र अग्नि साङ्गपाङ्ग रहेका थिए भने न्यु इंग्ल्याण्ड लोकल च्याप्टर महासचिव शेखर राई र भिम राई पनि रहेका थिए ।

युनाइटेड किरात राई अर्गनाइजेशन अफ अमेरिका, अमेरिकाको कानुन अनुसार दर्ता भएर ११ वटा राज्यमा च्याप्टर भएको संस्था हो । यसले नेपालमा भै परी आएको समयमा मानव सेवा लगायतको कार्यहरु गर्दै आएको जनाइएको छ । हाल नेपालमा संघीयता कार्यान्वयन गर्ने सन्दर्भमा प्रदेशको नामाकरण हुदै गर्दा पूर्वमा रहेको १४ जिल्ला हालको प्रदेश न (१ लाई किरात प्रदेश नामाकरण गरिनु पर्छ भनिएको छ ।

किरात समुदायले इतिहासको काल खण्डमा आफ्नो विशिस्ट भाषा,संस्कार संस्कृति सभ्यता स्थापीत गरी राज्यलाई नै समृद्ध बनाएकोले पनि किरात प्रदेश हुनु भूगोल, इतिहास र सभ्यताको सम्मान हो भनिएको छ । नेपालको इतिहासमा अस्तित्वमा रहेको वल्लो किरात, माझ किरात र पल्लो किरात भूगोलको एकीकृत स्वरुप नै हाल को १–न प्रदेश भएकोले सो प्रदेशको नामकरण “किरात प्रदेश’ होस् भन्ने माग गरिएको छ । यस भन्दा अगाडी पनि नेपालका किरात राई यायोख्खा केन्द्रिय समितीले हस्ताक्षर संकलन गरी मुख्यमंत्रीलाई बुझाउँदा अमेरिका बस्ने किरातहरुबाट अर्गनाइजेसनको पहलमा हस्ताक्षर संकलन गरि पठाईएको पूर्वकेन्द्रीय सभापति बिष्णु राईले बताएका छन् ।

उक्त ज्ञापनपत्र अमेरीकाका लागी नेपाली राजदूत डा अर्जुन कार्की समक्ष वाशिंगटन डि सीमा बुझाउने प्रयास गर्दा उहाँले बेवास्ता गरेको आरोप लगाउँदै अर्गनाइजेशनले खेद व्यक्त गरेको जनाएको छ । अमेरिकामा रहेको पहिचानवादीहरु रुष्ट भएको पनि बताइएको छ ।