हामी सबैकाे संसारन्यूज

३० मंसिर, हेटौँडा । संस्कृति, पर्यटन तथा नागरिक उड्डयन राज्यमन्त्री ईन्द्रबहादुर बानियाँले जीवनसँग वनलाई जोड्नुपर्ने बताउनुभएको छ ।

सामुदायिक वन उपभोक्ता महासङ्घ मकवानपुरको जिल्ला परिषद् तथा जिल्लास्तरीय सामुदायिक वन स्रोत केन्द्र भवनको हेटौँडामा बुधबार शिलान्याश गर्दै उहाँले वन, मानव सभ्यताका लागि आवश्यक र अपरिहार्य रहेको बताउनुभयो ।

वनलाई गरिब, दलित, विपन्नवर्गको हितमा अधिकतम सदुपयोग गर्नुपर्ने बताउनु हुँदै उहाँले यसमा सामुदायिक वनले महत्वपूर्ण भूमिका निर्वाह गरेको चर्चा गर्नुभयो । वनलाई वैज्ञानिक ढङ्गबाट व्यवस्थापन गर्न सके आयआर्जन र वनको उत्पादकत्वमा वृद्धि हुनेतर्फ ध्यान दिन सामुदायिक वन उपभोक्ता समूहलाई उहाँले आग्रह गनुभयो ।

महासङ्घको अगुवाइमा निर्माण हुन लागेको भवनका लागि आफूले सक्दो सहयोग गर्ने राज्यमन्त्री बानियाँले बताउनुभयो । सांसद् राजाराम स्यातानले वन संरक्षणमा आमउपभोक्ता लागिपरेको उल्लेख गर्नुभयो । सांसद् गणेश थापाले भवन निर्माणका लागि आफूले सक्दो सहयोग गर्ने बताउनुभयो ।
रु एक करोड नौ लाखको लागतमा निर्माण हुने दुई तले पाँच कोठे पक्की भवनमा दुई सभाहल रहने छन् । भवन निर्माण दुई वर्षभित्र सम्पन्न गर्ने लक्ष्य राखिएको छ । मकवानपुरमा हस्तान्तरण भएका सामुदायिक वन समूह ४११ वटा छन् । महासङ्घमा ३२० वटा आबद्ध छन् ।