हामी सबैकाे संसारन्यूज

सिम सिम पानी परेर भर्खर बसेको थियो । सडक चिसो देखिन्थ्यो । अगाडि लस्करै क्लिन काठमाण्डौं लगायतका ब्यानर बोकेर केही युवाहरुको लस्कर अनि केही झाडु बोकेर उभिएका थिए भने केही क्यामेरा बोकेर उभिएका थिए ।

त्यतिकैमा कालो रंगको बा ४ च ४५९ नम्बरको कारबाट पूर्व युवराज पारस शाह उत्रन्छन् । त्यतिकैमा कसैले उनलाई छाता ओढाएको पनि देखिन्छ । कालो र खैरो कलरको सल ओढेका पारस शाह सल मिलाउँदै अगाडि बढ्छन् ।

केही शुभचिन्तकले उनलाई फूलमाला लगाइदिन्छन् । लगाएको माला उत्तिखेरै निकालेर पारस शाह पुन ः अगाडि बढ्छन् ।
त्यतिकैमा शाहका शुभचिन्तकले पूर्वयुवराजलाई सडकमा ल्याउनु लाजको कुरा भन्दै यो समय अव मातृभूमिलाई बचाउनु छ भन्दै भाषण गर्छन् । त्यतिबेला पारस मुसुमुसु मुस्कुराउँदै थिए । त्यसको केही समयमै उनी झाडु समाएर ‘लेट्स स्टार्ट’ भनेर केही छिन झाडु लगाउँछन् र झाडु अरुको हातमा थमाइदिन्छन् ।

काठमाण्डौं मातृभूमि तथा काठमाण्डौंमा रहेका पाँचवटा लियो क्लवले आयोजना गरेको उक्त कार्यक्रममा क्लबका अध्यक्ष राजन भुसालल सबै युवालाई फिल्डमै उत्रेर काम गर्न अनुरोध गरेका थिए । उनले पूर्वराज युवराज पारस साहले ‘म पनि छु हैं’ भनेर युवाहरुलाई उत्साहित बनाएको बताएका थिए ।

दसई वर्षदेखि  सरसफाई अभियानमा लागेका सर्लाहीका युवा केपी खनालको निमन्त्रणामा पारस त्यहाँ पुगेका थिए । उनीहरुले पशुपति मन्दिरमा शिवरात्रीका बेला थुपारिएको फोहोर सफा गरेको बताएका थिए ।

थाइल्याण्डबाट फर्किएपछि सर्वसाधारणको जीवनशैली अपनाएका भनिएका पारस शाह पछिल्लो समय युट्युवर सोनिका सोनिका रोकायासँग निकटता बढाएका छन् । केही समयअघि उनले सोनिकाको जन्मदिनमा हिराको हार उपहार दिएर चर्चामा आएका थिए ।