हामी सबैकाे संसारन्यूज

भारत लखनउकी चर्चित गायिका कनिका कपुर यतिबेला लखनउस्थित संजय गान्धी अस्पतालमा क्वारेन्टाइनमा रहेर उपचार गराइरहेकी छन् । तर कपुरले शनिबार अस्पतालले राम्रो सेवा सुविधा नदिएको आरोप समेत लगाएकी छन् ।

कपुरले यस्तो आरोप लगाएपछि अस्पतालका डाइरेक्टरले कनिका कपुरलाई अस्पतालमा सेलिब्रेटी नभइ विरामीको जस्तो व्यवहार गर्न सुझाएका छन् । उनले कनिकालाई राम्रो स्वास्थ्य सेवा दिइरहेको अवस्थामा पनि अस्पतालका स्टाफलाई दवाव दिइरहेको समेत बताएका छन् । उनले आफ्नो उपचारका लागि संयम भएर अस्पताललाई सहयोग गर्न पनि भनेका छन् ।

अस्पतालले कनिकालाई अलग बेडसिट, बाथरुम, विस्तरा, टिभीलगायतका सेवा उपलब्ध गराउनुका साथै अस्पतालको किचनबाट ग्लूटोन फ्रि डाइट उपलब्ध गराएको पनि जनाइएको छ ।

मार्च ९ मा लन्डनबाट फर्किएकी कनिकाले आउनासाथ पार्टी दिएकी थिइन् । उनको पार्टीमा आएका ४५ जनाको कोरोना जाँचमा नेगेटिभ देखिएको बताइएको छ ।

कनिका लखनउको महानगरस्थित एक अर्पाटमेन्टमा बसेकी थिइन् । जुन अर्पाटमेन्टमा ७०० परिवार रहेको बताइएको छ । साथै १५ मार्चमा लखनउको ताज होटलमा भारतीय कांग्रेसका पूर्वसांसद जितिन प्रसादका ससुरा आदेश सेठले दिएको पार्टीमा कनिका सहभागी भएको र उक्त पार्टीमा राजस्थानकी पूर्वमुख्यमन्त्री, बसुन्धरा राजे, उनका छोरा दुष्यन्त सिंह, उत्तर प्रदेशका स्वास्थ्यमन्त्री जयप्रतापलगायतको सहभागिता रहेको बताइएको छ ।